سابق وزیراعظم اور چیئرمین پاکستان تحریک انصاف عمران خان کی اہلیہ بشریٰ بی بی کی توشہ خانہ اور 190 ملین پاؤنڈ سکینڈل کیسز کی سماعت جیل میں ہوگی۔
احتساب عدالت اسلام آباد میں سابق وزیراعظم عمران خان کی اہلیہ بشریٰ بی بی کی توشہ خانہ اور 190 ملین پاؤنڈ سکینڈل کیسز میں ضمانت کی درخواستوں پر سماعت کا آغاز ہوا۔
احتساب عدالت کے جج محمد بشیر نے کیس کی سماعت کی۔
سابق خاتون اول بشریٰ بی بی احتساب عدالت میں پیش نہ ہوئیں۔
عدالت نے استفسار کیا کہ بشریٰ بی بی کے وکیل لطیف کھوسہ صاحب کدھر ہیں؟
وکیل انتظار حسین پنجوتھہ نے عدالت کو بتایا کہ وہ اسلام آباد ہائیکورٹ میں ہیں۔ کیس کی سماعت جیل ہی میں ہی رکھ لیں۔
اس پر جج محمد بشیر نے استفسار کیا کہ کب تک کھوسہ صاحب ہائیکورٹ سے فارغ ہوجائیں گے؟
وکیل انتظار حسین پنجھوتھہ نے عدالت کو بتایا کہ وہ آدھ گھنٹے تک عدالت سے فارغ ہوجائیں گے۔ اس پر جج محمد بشیر نے کہا ’ٹھیک ہے، جیل ہی میں سماعت کر لیتے ہیں۔ آدھے گھنٹے تک میں جیل کے لیے نکلتا ہوں۔ بشریٰ بی بی کی ضمانت کی درخواستوں پر سماعت بھی جیل ہی میں ہو گی۔
