ایف آئی اے انسداد انسانی اسمگلنگ سیل کراچی نے کارروائی کرتے ہوئے انسانی اسمگلنگ میں ملوث کارندے کو گرفتار کر لیا ہے۔ ملزم منصور علی کو کراچی کے علاقے پی ای سی ایچ ایس سے گرفتار کیا گیا ہے۔
ڈائریکٹر کراچی زون ضعیم شیخ کی ہدایت پر انسانی اسمگلرز کی گرفتاری کے لیے کریک ڈاؤن جاری ہے، جس پر عمل درآمد کرنے کے لیے ڈپٹی ڈائریکٹر اینٹی ہیومن ٹریفکنگ سرکل بہاول اوستو کے احکامات پر چھاپہ مار ٹیم نے کارروائی کرتے ہوئے انسانی اسمگلرز کو گرفتار کر لیا۔
مزید پڑھیں
چھاپہ مار ٹیم میں انسپکٹر بابرعلی، سب انسپکٹر شاہد مصطفیٰ، مہران خان اور کانسٹیبل حسن شامل تھے، گرفتار ملزم انسانی اسمگلنگ کے گھناؤنے جرم میں ملوث تھا اور بغیر لائسنس کے سادہ لوح شہریوں سے بیرون ملک ملازمت کی آڑ میں پاسپورٹس وصول کر رہا تھا۔
ترجمان ایف آئی اے کے مطابق گرفتار ملزم نے شہریوں سے بیرون ملک ملازمت کے نام پر لاکھوں روپے بٹورے، چھاپے کے دوران ملزم کے قبضے سے متعدد پاسپورٹس بھی برآمد کر لیے گئے ہیں۔
ترجمان نے بتایا کہ ملزم سے متعدد فارمز، چیک بکس، اسٹمپس اور دیگر سفری دستاویزات بھی برآمد کی گئی ہیں اور تفتیش کا آغاز بھی کر دیا گیا ہے، جبکہ دیگر ملزمان کی گرفتاری کے لیے چھاپے بھی مارے جا رہے ہیں۔
