سیکیورٹی فورسز نے بلوچستان کے ضلع قلات میں دہشتگردوں کے خلاف آپریشن کیا ہے اور 2 دہشتگرد ہلاک کر دیے ہیں۔
پاک فوج کے شعبہ تعلقات عامہ (آئی ایس پی آر) کے مطابق فورسز نے قلات کے علاقے نگاؤ کی پہاڑیوں میں خفیہ اطلاع پر آپریشن کیا۔
آئی ایس پی آر نے بتایا کہ سیکیورٹی فورسز نے دہشتگردوں کی موجودگی کی اطلاع پر آپریشن کیا تو اس دوران فائرنگ کا تبادلہ ہو گیا جس کے نتیجے میں 2 دہشت گرد ہلاک ہو گئے۔
آئی ایس پی آر کے مطابق ہلاک دہشتگردوں کے قبضے سے اسلحہ و گولہ بارود کا ذخیرہ برآمد ہوا ہے۔
ترجمان نے بتایا کہ علاقے میں دہشتگردوں کے خاتمے کے لیے کلیئرنس آپریشن جاری ہے، دہشتگرد شہریوں کی ٹارگٹ کلنگ اور سیکیورٹی فورسز پر حملوں میں ملوث تھے۔
آئی ایس پی آر نے کہاکہ سیکیورٹی فورسز ملک سے دہشتگردی کی لعنت ختم کرنے کے لیے پُر عزم ہیں۔
