آرمی چیف جنرل سید عاصم منیر نے کہا ہے کہ غیر قانونی طور پر مقیم غیر ملکی پاکستان کی سلامتی اور معیشت کو بری طرح متاثر کر رہے ہیں جنہیں با عزت طریقے سے ان کے ملکوں میں واپس بھیجا جارہا ہے۔
پاک فوج کے شعبہ تعلقات عامہ آئی ایس پی آر کے مطابق جمعرات کے روز آرمی چیف جنرل سید عاصم منیر نے کورکمانڈر ہاؤس پشاور کا دورہ کیا جہاں کورکمانڈر پشاور نے ان کو صوبہ خیبرپختونخوا میں سیکیورٹی کی مجموعی صورتحال، انسداد دہشت گردی کے خلاف جاری کارروائیوں، غیر قانونی طور پر مقیم غیر ملکیوں کی وطن واپسی اور نئے ضم شدہ اضلاع میں سماجی و اقتصادی ترقی کی پیش رفت کے بارے میں تفصیلی بریفنگ دی۔
مزید پڑھیں
آرمی چیف نے انسداد دہشت گردی کی مختلف کارروائیوں کے دوران بہادری اور شجاعت کا مظاہرہ پیش کرنے والے افسران اور جوانوں سے ملاقات کے دوران ان کی حوصلہ افزائی کی۔
آئی ایس پی آر کے مطابق آرمی چیف نے پہلی بار منعقد ہونے والی قومی ورکشاپ خیبرپختونخوا (NWKP-1) کے شرکا سے بھی خصوصی خطاب کیا۔
آرمی چیف نے دہشت گردی کے خلاف جنگ میں پاک فوج کے افسران اور جوانوں کی بے مثال کارکردگی کوسراہتے ہوئے کہا کہ قوم کو مسلح افواج کی کارکردگی پر فخر ہے۔
جنرل سید عاصم منیر نے کہا کہ کامیابی پاکستان کا مقدر ہے اور پاک فوج مادر وطن کے ایک ایک انچ کی حفاظت کا بے لوث اور مقدس فریضہ خون کے آخری قطرے تک ادا کرتی رہے گی۔
شرکاء سے خطاب کرتے ہوئے آرمی چیف کا کہنا تھا کہ سیکورٹی فورسز کوخیبر پختونخوا کےغیورعوام کی پُرعزم حمایت کے باعث ہی صوبے میں استحکام اور سماجی و اقتصادی ترقی کے منصوبوں پر پیش رفت حاصل ہوئی ہے۔
یہ بھی پڑھیں : ریاست کے سوا کسی بھی ادارے یا گروہ کی طرف سے طاقت کا استعمال اور مسلح کارروائی ناقابل قبول ہے، آرمی چیف
پاکستان کی خوشحالی کو خیبرپختونخوا سے نتھی کرتے ہوئے آرمی چیف نے زور دیا کہ پاکستان کے امن اور استحکام کے لیے دشمن قوتوں کے مذموم عزائم کو ہم آہنگی اور جامع حکمت عملی کے ذریعے ناکام بنایا جا رہا ہے۔
آرمی چیف نے واضح کیا کہ ملک میں غیر قانونی طور پر مقیم غیر ملکی قومی سلامتی اور معیشت کو بری طرح متاثر کر رہے ہیں، ان کی وطن واپسی کا فیصلہ حکومت نے ملک کے وسیع تر مفاد میں کیا ہے۔
جنرل سید عاصم منیر نے کہا کہ ملک میں غیر قانونی طور پر مقیم غیر ملکیوں کو طے شدہ اصولوں کے مطابق باعزت طریقے سے ان کے ملکوں میں واپس بھیجا جا رہا ہے۔
