نگراں حکومت پنجاب نے 10 سال بعد پنجاب کی 1 ہزار 112 نہروں کی بھل صفائی کا فیصلہ کیا ہے، جو کہ 26 دسمبر سے شروع ہوگی اور 20 جنوری تک جاری رہے گی۔ نگراں وزیر اعلیٰ پنجاب محسن نقوی نے ہدایت کی ہے کہ بھل صفائی کے ساتھ ساتھ نہروں کی مرمت پر بھی توجہ دی جائے۔
نگراں حکومت پنجاب نے تمام ڈویژنل کمشنرز کو نہروں کی بھل صفائی کی مانیٹرنگ کا ٹاسک سونپ دیا ہے۔ نگراں وزیر اعلیٰ نے ہدایت کی ہے کہ بھل صفائی کے دوران کمشنرز فیلڈ میں رہیں گے اور تمام امور کی نگرانی کریں گے۔
مزید پڑھیں
وزیراعلی محسن نقوی نے نہری پانی کی چوری کے سدباب کے لیے مؤثر کارروائی کا حکم دیتے ہوئے کہا کہ انتظامی افسران پانی چوری کے سدباب کے لیے اپنے متعلقہ اضلاع میں مؤثرایکشن لیں۔
وزیراعلیٰ پنجاب محسن نقوی کی زیر صدارت اجلاس میں بھل صفائی کے پروگرام اور پانی چوری کی روک تھام کے لیے اقدامات کا جائزہ لیا گیا۔ ایڈیشنل چیف سیکرٹری، چیئرمین پلاننگ اینڈ ڈویلپمنٹ بورڈ، سیکرٹریز، زراعت، آبپاشی، خوراک، اطلاعات، کمشنرلاہور اور محکمہ زراعت کے متعلقہ افسران نے اجلاس میں شرکت کی۔
صوبائی وزیر زراعت ایس ایم تنویر اورتمام ڈویژنل کمشنرزویڈیو لنک کے ذریعے اجلاس میں شریک ہوئے۔
