آسٹریلیا میں انتظامات پر مایوسی ہوئی، محمد حفیظ

پاکستان کرکٹ ٹیم کے ٹیم ڈائریکٹر محمد حفیظ کا کہنا ہے کہ کینبرا میں 4 روزہ میچ کے انتظامات دیکھ کر بہت حیرانی اور مایوسی ہوئی کیونکہ وہ پچ بہت سلو تھی جس پر ابتک ہم آسٹریلیا میں کھیلے ہیں، لیکن ہوسکتا ہے کہ یہ ان کی حکمت عملی ہو تاہم وہ ٹیسٹ سیریز کے لیے پوری طرح تیار ہیں۔

محمد حفیظ نے پرتھ میں پاکستان ٹیم کی پریکٹس کے موقع پر میڈیا سے بات کرتے ہوئے کہا کہ پاکستان اور آسٹریلیا کے درمیان پہلا ٹیسٹ 14 دسمبر سے پرتھ میں شروع ہوگا۔ پاکستان ٹیم آسٹریلیا کے خلاف ٹیسٹ سیریز کے چیلنج کے لیے تیار ہے۔ ہم یہاں مقابلہ کرنے نہیں بلکہ آسٹریلیا کو ہرانے کی سوچ کے ساتھ آئے ہیں۔

ان کا کہنا تھا کہ پاکستان ٹیم ٹیسٹ فارمیٹ میں سیٹ ہوچکی ہے اور اس نے اپنے ملک کے لیے نمایاں کارکردگی دکھائی ہے۔ حوصلہ افزا بات یہ ہے کہ ٹیم چیلنج قبول کرنے کے لیے پرجوش ہے اور آسٹریلیا میں اچھا کھیلنا ان کے لیے بہت اچھا ہوگا۔

انہوں نے کہا کہ ٹیم میں ٹیلنٹ ہے اور ہم نے تیاری میں متعدد باکس ٹک کیے ہیں۔ لڑکے صلاحیتوں کے اظہار کے لیے پرجوش اور جیتنا چاہتے ہیں۔ ابرار احمد ان فٹ ہیں لیکن باقی لڑکے فٹ اور پوری طرح تیار ہیں۔ ابرار احمد پہلے ٹیسٹ کے لیے دستیاب نہیں، ان کا ری ہبلیٹیشن جاری ہے اور امید ہے کہ وہ دوسرے ٹیسٹ تک فٹ ہوجائیں گے۔

محمد حفیظ نے کہا کہ نیتھن لائن بڑے بؤلر ہیں۔ انہوں نے اپنے ملک کے لیے ٹیسٹ جیتے ہیں لیکن ہم عام طور پر آف اسپنر کو اچھا کھیلتے ہیں۔ آخری چند سیریز میں ہم نے ان کے خلاف زیادہ رنز کیے ہیں۔ مجھے امید ہے کہ اس سیریز میں بھی کھلاڑی اچھی کارکردگی دکھائیں گے۔