ضلع پشاور کی تحصیل بڈھ بیر میں دوہرے قتل کی ایک منفرد واردات میں میاں بیوی نے ایک دوسرے کو فائرنگ کر کے قتل کردیا۔
تھانہ بڈھ بیر کی حدود میں واقع گاؤں شہاب خیل میں میاں بیوی نے معمولی تکرار پر ایک دوسرے پر بے دریغ فائرنگ کردی۔
فائرنگ کے نتیجہ میں گل مینہ اپنے شوہر بخش مسلم کی فائرنگ کی تاب نہ لاتے ہوئے موقع پر ہی ہلاک ہوگئی جب کہ بخش ہسپتال پہنچ کر بھی جانبر نہ ہوسکا۔
پولیس کی ابتدائی رپورٹ کے مطابق دونوں میاں بیوی کے مابین معمولی تکرار ہوئی جس پر خاوند نے غصہ میں جذباتی ہوکر بیوی پر پستول نکالی بعد ازاں بیوی نے کمرے میں پڑی کلاشنکوف اٹھاکر فائرنگ کردی۔
پولیس نے موقعہ پر پہنچنے کے بعد شواہد اکٹھے کرکے تفتیش شروع کر دی ہے۔
