پاکستان مسلم لیگ ن کے صدر اور سابق وزیراعظم شہباز شریف نے کہا ہے کہ پاکستان تحریک انصاف (پی ٹی آئی) سائفر کی طرح 8 فروری کے عام انتخابات کے خلاف بھی سازش کر رہی ہے۔
شہباز شریف نے اپنے ایک جاری میں بیان میں کہا کہ پی ٹی آئی ملک میں 8 فروری کے انتخابات ملتوی کرانے کی سازش کر ر ہی ہے، الیکشن کے خلاف پی ٹی آئی درخواستیں الیکشن سے فرار کی منصوبہ بندی ہیں، پی ٹی آئی کی درخواست عوام کی ترجمانی کو سبوتاژ کرنے کی سازش ہے۔
مزید پڑھیں
شہباز شریف کا کہنا تھا کہ 2018ء کے انتخابات میں بھی بیوروکریسی نے ہی ڈسٹرکٹ ریٹرننگ افسران کی ذمہ داریاں نبھائی تھیں مگر اس وقت پی ٹی آئی نے اعتراض نہیں کیا تھا اور اب یہ پارٹی ڈی آر اوز کے خلاف درخواست لے کر لاہور ہائیکورٹ چلی گئی ہے۔
انہوں نے کہا کہ پی ٹی آئی ہمیشہ کی طرح دوغلی، دوہری اور منفقانہ پالیسی پر کاربند ہے، پی ٹی آئی 8 فروری سے فرار کی راہیں تلاش کررہی ہے، پی ٹی آئی میڈیا میں الیکشن جلد کرانے کے اعلان کرتی ہے جبکہ عملی طورپر عدالتوں میں تاخیر کی درخواستیں دائر کرتی ہے۔
انہوں نے کہا کہ 8 فروری 2024ء کے انتخابات میں تاخیر ہوئی تو ذمہ دار پی ٹی آئی ہوگی، سائفرکے معاملہ پر عوام سے کچھ کہا اور تحقیقات میں کچھ اور، پی ٹی آئی یہی منفاقت الیکشن کے حوالے سے بھی اپنائے ہوئے ہے۔
صدر ن لیگ کا مزید کہنا تھا کہ آئی ایم ایف پروگرام کے حوالے سے بھی پی ٹی آئی نے ایسی ہی سازش کی تھی، پی ٹی آئی ملک میں آئینی بحران پیدا کرکے سیاسی عدم استحکام چاہتی ہے، پی ٹی آئی نہیں چاہتی کہ ملک معاشی طور پر مضبوط ہو اور عوام کی معاشی مشکلات ختم ہوں۔
