سابق وزیراعظم و صدر پاکستان مسلم لیگ ن شہباز شریف نے کہا ہے کہ نواز شریف کو سزائیں سنا کر قوم اور ملک کو سزا دی گئی، قوم کو مہنگائی، بے روزگاری اور معاشی بدحالی کی سزاؤں سے نجات دلائیں گے۔
پارٹی رہنماؤں سے گفتگو کرتے ہوئے شہبازشریف نے کہاکہ نوازشریف کے خلاف صرف مقدمات ہی نہیں مقدمات بنانے والے بھی جھوٹے نکلے، ہم قوم کی ترقی پر پوری توجہ اور صلاحیتیں مرکوز کریں گے۔
مزید پڑھیں
انہوں نے کہاکہ 16 ماہ کے دوران ریاست کے مفادات میں کیے گئے ہمارے مشکل مگر درست فیصلوں کے نتیجے میں معیشت بہتر ہو رہی ہے۔
انہوں نے پارٹی رہنماؤں کو عام انتخابات کی بھرپور تیاریاں کرنے کی ہدایات دیں۔
شہبازشریف سے رانا اقبال و دیگر کی ملاقات
شہباز شریف سے سابق اسپیکر پنجاب اسمبلی رانا اقبال، میاں ثاقب خورشید، جاوید علی شاہ، عائشہ ارشد لودھی اور نوید اسلم لودھی نے ملاقات کی۔
اس کے علاوہ شیخ فیاض، عابد رضا کوٹلہ، سید مبین، قطب کوریجہ، مخدوم مبین، چوہدری محمود عالم، چوہدری ارشد اور منور کھیتران شہباز شریف سے ملے۔
شہباز شریف سے پارٹی رہنماؤں کی ملاقاتوں میں پارٹی امور اور عام انتخابات کے حوالے سے تبادلہ خیال کیا گیا۔
اس موقع پر سابق اسپیکر قومی اسمبلی سردار ایاز صادق اور سابق وزیر ملک محمد احمد خان بھی موجود تھے۔
شہبازشریف سے ملاقات کرنے والے پارٹی رہنماؤں نے سیاسی انتقام پر مبنی مقدمات سے قائد نواز شریف کی بریت پر پارٹی صدر کو مبارک دی، شہباز شریف نے نیک تمناؤں کے اظہار پر رہنماؤں کا شکریہ ادا کیا۔
