سائفر کیس: عمران خان نے ان کیمرہ سماعت کا ٹرائل کورٹ کا فیصلہ چیلنج کردیا

پاکستان تحریک انصاف کے بانی چیئرمین عمران خان نے سائفر کیس کی ان کیمرہ سماعت کا ٹرائل کورٹ کا فیصلہ چیلنج کردیا ہے۔

اسلام آباد ہائیکورٹ میں اپنے وکیل سلمان اکرم راجہ کے ذریعے دائر کی گئی درخواست میں بانی پی ٹی آئی عمران خان نے عدالت سے استدعا کی ہے کہ سائفر کیس میں ٹرائل کورٹ کے ان کیمرہ ٹرائل کا حکم نامہ کالعدم قرار دیا جائے، درخواست پر فیصلہ ہونے تک عدالت سائفر کیس کے ٹرائل کی کارروائی کو معطل قرار دے۔

درخواست میں مؤقف اپنایا گیا ہے کہ آفیشل سیکرٹ ایکٹ کی شق 14 کے تحت عام عوام کو ٹرائل کے کسی مخصوص حصے سے بے دخل کیا جاسکتا ہے، آفیشل سیکرٹ ایکٹ کی شق 14 کے تحت عام عوام کی ٹرائل سے مکمل طور پر بے دخلی کی اجازت نہیں، ٹرائل کورٹ نے مناسب غور و فکر کیے بغیر ان کیمرہ ٹرائل کا حکم جاری کیا۔

عمران خان کی جانب سے دائر کردہ درخواست میں مزید کہا گیا کہ استغاثہ کی جانب سے دائر کی گئی درخواست عام عوام کی مکمل ٹرائل سے بے دخلی کا ضروری جواز پیش کرنے میں ناکام رہی، ٹرائل کورٹ نے سائفر کیس کی میڈیا پر رپورٹنگ پر بھی پابندی عائد کردی جو کہ خلاف آئین ہے۔

درخواست میں مزید کہا گیا کہ ٹرائل کورٹ نے پی ٹی اے اور پیمرا کو بغیر کسی قانونی اتھارٹی کے غیرقانونی طور پر میڈیا اور سوشل میڈیا کو سینسر کرنے کے احکامات جاری کیے، ٹرائل کورٹ کا یہ حکم نامہ آئین کے آرٹیکل 10 اے کی خلاف ورزی ہے۔

بانی پی ٹی آئی نے اپنی درخواست میں کہا کہ انصاف کے تقاضوں کو پورا کرنے کے لیے عوام اور میڈیا کی موجودگی میں اوپن ٹرائل ہونا ناگزیر ہے، انصاف ہوتا ہوا دکھائی دینا بھی ضروری ہے۔