پنجاب میں ہر سال 42 لاکھ بچوں کی مختلف موذی امراض سے بچاؤ کی ویکسینیشن کی جارہی ہے جو مجموعی طورپر 90 فیصد کے قریب ہے تاہم اسے 100 فیصد بنانا ہدف ہے۔
سینیئر ہیلتھ آفیسر یونیسف پنجاب ڈاکٹر مشتاق احمد شاد نے بتایا کہ والدین میں ان کے بچوں کے لیے حفاظتی ٹیکوں کی افادیت اور اہمیت کے بارے میں شعور اجاگر کرنے کے لیے آگاہی پروگرامز کا دائرہ مزید وسیع کیا جارہا ہے۔
ڈاکٹر مشتاق کا کہنا تھا کہ مہم کا مقصد ہر والدین میں 2 سال تک کے بچے کی 12مختلف بیماریوں سے بچاؤ کے لیے ویکسی نیشن کرانے کا احساس برقراررکھنا ہے۔ ان کا مزید کہنا تھا کہ بچوں کو حفاظتی ٹیکوں کا کورس مکمل کرانا ایک قومی فرض ہے جس سے ان کی جان کی حفاظت ہوتی ہے۔
انہوں نے کہا کہ پیدائش سے2 سال تک بچوں کو حفاظتی ٹیکے لگوا کر تپ دق، پولیو، خناق، نمونیا،کالی کھانسی،کالا یرقان،گردن توڑ بخار،اسہال،تشنج اور خسرہ جیسی مہلک بیماریوں سے بچایا جاسکتا ہے۔
سینیئر ہیلتھ آفیسر یونیسف پنجاب کا کہنا تھا صحتمند معاشرے کے قیام کے سلسلے میں بچوں کو مہلک بیماریوں سے محفوظ رکھنے کے لیے حفاظتی ٹیکوں کا کورس ناگزیر ہے جس کے لیے حکومتی سطح پر مؤثر اقدامات کیے جارہے ہیں تاہم بچوں میں بیماریوں کے خلاف قوت مدافعت میں اضافہ کے لیے ویکسینیشن لازمی کرانے کا پیغام عام کرنے کی اشد ضرورت ہے تاکہ قوم کے مستقبل کی صحت کا تحفظ یقینی ہوسکے۔ انہوں نے واضح کیا کہ مذکورہ تمام ویکسینیشن بالکل مفت کی جارہی ہے۔
