مجھے پیغام دیا گیا ہے اگر ہماری بات مانیں گے تو کرپشن سمیت تمام مقدمے ختم ہو جائیں گے، عمران خان

بانی پی ٹی آئی عمران خان نے کہا ہے کہ مجھے ایک پیغام دیا گیا ہے کہ اگر ہماری بات مانیں گے تو کرپشن سمیت تمام مقدمے معاف (ختم) ہو جائیں گے، بتانا چاہتے تھے کہ ہم جب چاہیں کسی کو بھی ڈرائی کلین کر سکتے ہیں۔ مجھ پر 2 سو کیسز کر دیے گئے، کیا ملکی تاریخ میں کسی پر اتنے مقدمات ہوئے ہیں۔

بانی پی ٹی آئی کیخلاف توشہ خانہ، سائفر کیس کی اڈیالہ جیل میں سماعت کے دوران عمران خان نے میڈیا سے گفتگو میں کہا کہ نواز شریف، مریم نواز، آصف علی زرداری، شہباز شریف کی اربوں روپے کی کرپشن معاف کردی گئی ہے۔ جنرل باجوہ نے مجھے اور شاہ محمود قریشی کو رجیم چینج آپریشن پر خاموش رہنے کا کہا تھا، سائفر کیس میں یہ بتایا جارہا ہے کہ تمہاری ہمت کیسے ہوئی رجیم چینج کرنے والوں کو ایکسپوز کرنے کی

بانی پی ٹی آئی نے کہا کہ چھوٹی سی ایلیٹ قانون کے اوپر بیٹھی ہوئی ہے، یہ آپ کے سامنے جنگل کا قانون ہے۔ ایک صحافی نے سوال کیا کہ کہا جا رہا ہے کہ 9 مئی پر معافی مانگ لیں تو معاملات ٹھیک ہو سکتے ہیں؟ اس پر ان کا کہنا تھا کہ 9 مئی کی بات کرتے ہیں، 9 مئی کو ظلم تو مجھ پر ہوا ہے۔

فلسطین اور یمن کی صورتحال سے متعلق صحافی کے سوال پر عمران خان نے کہا کہ فلسطینیوں پر جو ظلم ہو رہا ہے اس کی کوئی مثال نہیں ملتی، فلسطینیوں کی نسل کشی ہو رہی ہے، فلسطین میں کوئی لڑائی یا جنگ نہیں بلکہ ظلم وستم ہو رہا ہے۔