پاکستان تحریک انصاف کے بانی عمران خان نے شیرافضل مروت کو سندھ میں سیاسی سرگرمیاں معطل کرنے کی ہدایت کرتے ہوئے اسلام آباد طلب کر لیا ہے۔
ذرائع کے مطابق آج پی ٹی آئی کے سینیئر وکیل حامد خان نے اڈیالہ جیل میں عمران خان سے ملاقات کی ہے۔
حامد خان نے عمران خان کو بتایا کہ شیرافضل مروت نے دورہ سندھ میں مخالفین کے بجائے اپنے لوگوں پر تنقید کرنا شروع کردی۔
حامد خان نے عارف علوی کے علاوہ رؤف حسن سے متعلق نازیبا الفاظ استعمال کرنے کا معاملہ بھی عمران خان تک پہنچایا جس کے بعد عمران خان نے شیر افضل مروت کو فوراً پیش ہونے کا پیغام پہنچایا ہے۔
مزید پڑھیں
واضح رہے کہ شیر افضل مروت نے سندھ میں انتخابی مہم کے دوران صدرمملکت عارف علوی پر تنقید کی تھی جس کے بعد حامد خان اور رؤف حسن نے بھی ان کے خلاف بات کی۔
پی ٹی آئی کے مرکزی رہنما رؤف حسن نے ایک ٹی وی شو میں گفتگو کے دوران کہا تھا کہ دیکھنا ہوگا شیرافضل مروت عمران خان سے جیل میں ملتے بھی ہیں کہ نہیں۔
رؤف حسن کے اس بیان کے جواب میں شیرافضل مروت نے کہا تھا کہ کچھ لوگوں کو پارٹی میں مجھ سے تکلیف ہے۔ عمران خان عارف علوی سے شدید مایوس ہیں اور میں نے صدرمملکت کے خلاف ٹوئٹ بھی بانی پی ٹی آئی کے کہنے پر کی تھی۔
