بنگلہ دیش پریمیئر لیگ کی فرنچائز فارچیون باریشل کے مالک میزان ملک نے واضح کیا ہے کہ ان کی ٹیم نے شعیب ملک کے ساتھ کانٹرکٹ منسوخ نہیں کیا ہے بلکہ وہ نجی مصروفیات کے سبب ٹیم کو چھوڑ کر دبئی گئے ہیں۔
اس سے قبل یہ خبریں گردش کررہی تھیں کہ پاکستان کے سابق کپتان کو فکسنگ کے الزام کے سبب فرنچائز نے الگ کردیا ہے۔
سوشل میڈیا پر شعیب ملک کا ایک اوور میں تین نوبال کرانے پر میچ فکسنگ کا واویلا مچ گیا ٹیم کے مالک میزان رحمن کہتے ہیں کہ شعیب ملک کے متعلق فکسنگ والی خبریں بے بنیاد ہیں. شعیب ملک بہت بڑے کھلاڑی ہیں ایسی من گھڑت باتوں پر یقین نہ کریں. شعیب ملک ذاتی مصروفیات کی وجہ سے دبئی گئے ہیں.… pic.twitter.com/loo0SVwfU7
— Qadir Khawaja (@iamqadirkhawaja) January 26, 2024
واضح رہے کہ اس ہفتے کے شروع میں شعیب ملک پر فارچیون باریشال کے لیے بی پی ایل 2024 کے میچ میں ناقص کارکردگی کا الزام لگایا گیا تھا۔ انہوں نے کھلنا ٹائیگرز کے خلاف صرف ایک اوور میں 3 نو بالز کیں اور 18 رنز دیے، اور میچ کے دوران ڈیتھ اوورز میں 6 گیندوں پر صرف5 رنز بنائے تھے۔
مزید پڑھیں
شعیب ملک کی اس کارکردگی پر شائقین کرکٹ نے سوال اٹھانا شروع کردیے اور الزام عائد کیا کہ شعیب ملک نے نو بالز جان بوجھ کر پھینکی تھیں۔ جس پر بنگلہ دیش پریمیئر لیگ نے کارروائی کرتے ہوئے معاہدہ ختم کر دیا۔ بنگلہ دیشی اسپورٹس جرنلسٹ سید سمی نے ایکس پر پوسٹ کے ذریعے تصدیق کرتے ہوئے لکھا کہ فارچیون باریشال نے اب شعیب ملک کا معاہدہ فکسنگ کے شبے میں ختم کر دیا ہے۔
واضح رہے شعیب ملک نے پاکستان کے لیے 35 ٹیسٹ، 287 ون ڈے اور 124 ٹی20 کھیلے ہیں۔ پاکستان کے لیے انہوں نے آخری ٹی20 میچ نومبر 2021 میں بنگلہ دیش کے خلاف کھیلا تھا۔
یاد رہے رواں ہفتے شعیب ملک اپنی شادی کی خبروں کے سبب سوشل میڈیا اور خبروں کی زینت بنے رہے ہیں۔ شعیب ملک سابق بھارتی ٹینس اسٹار ثانیہ مرزا سے علیحدگی اختیار کرکے، پاکستانی اداکارہ ثنا جاوید کے ساتھ تیسری شادی کے بندھن میں بندھ گئے ہیں۔
