بالی ووڈ اسٹار سلمان خان اپنی دریا دلی کے لیے مشہور ہیں۔ اس لیے ان کے پرستار بھی انہیں ’بھائی جان‘ کہتے ہیں۔ فلم انڈسٹری میں ایسے کئی شخصیات ہیں، جو لوگوں کی مدد کرنے کے لیے ہمیشہ آگے آتی ہیں اور اپنے کیے وعدے پورے کرتی ہیں۔ ایسا ہی ایک وعدہ سلمان خان نے کچھ سال پہلے 9 سال کے بچے جگن بیر سے کیا تھا۔ جگن بیر ایک ’کینسر سروائیور‘ ہے، جس نے 5 سال تک کیموتھیراپی کے 9 سیشن کے بعد کینسر پر فتح پائی۔ اب ٹھیک ہونے کے بعد جگن سیدھے سلمان خان کی رہائش گاہ باندرہ پہنچا اور سلمان خان سے ملاقات کی۔
مزید پڑھیں
سلمان خان نے سال 2018 میں اپنے ننھے پرستار سے ملاقات کی تھی۔ اس وقت جگن بیر کی عمر محض 4 سال تھی۔ میڈیا رپورٹس کے مطابق، جب سلمان خان پہلی بار جگن بیر سے ملے تو وہ ممبئی کے ٹاٹا میموریل سینٹر میں ایڈمٹ تھا، جہاں اس کے ٹیومرکے علاج کے لیے کیموتھیراپی چل رہی تھی۔
کیمو ٹریٹمنٹ کے دوران جگن بیر کی آنکھوں کی روشنی جا چکی تھی۔ جب سلمان خان ان سے ملنے پہنچے تو جگن بیرنے چہرے اور ہاتھ کے بریسلیٹ سے اداکار کو پہچانا تھا۔ انڈین ایکسپریس کے مطابق، جگن کی ماں سکبھیر کور نے بتایا تھا کہ جگن بیر جب 3 سال تھا، اسی دوران اس کی آنکھوں کی روشنی چلی گئی تھی۔
تشخیص کے دوران اس کے دماغ میں سکے کے برابر ٹیومر پایا گیا تھا، جس کے بعد ڈاکٹروں نے جگن بیر کو علاج کے لیے ممبئی جانے کا مشورہ دیا تھا۔ جگن کو ممبئی لے جایا گیا تو اسے لگا کہ وہ سلمان خان سے ملنے جا رہا ہے۔
جگن بیر کی ماں نے مزید بتایا کہ ممبئی جانے کی وجہ سے وہ کافی خوش تھا۔ اس کی اسی خوشی کو دیکھتے ہوئے فیملی نے فیصلہ کیا کہ اسے سچ نہیں بتایا جائے گا۔ جب یہ خبر سلمان خان کو ملی تو اداکار ممبئی کے ٹاٹا میموریل سینٹر میں جگن بیر سے ملنے پہنچے۔ جگن بیرکے والد سکبھیر کا کہنا ہے کہ ان کا بیٹا اب ٹھیک ہے اور اس کی 99 فیصد آنکھوں کی روشنی واپس آگئی ہے۔
