خواجہ آصف نے دھاندلی کی، ثبوت عدالت میں پیش کروں گی، ریحانہ ڈار

مسلم لیگ ن کے رہنما خواجہ آصف کی الیکشن میں کامیابی کے خلاف درخواست پر سماعت آج لاہور ہائیکورٹ میں ہوگی۔ پی ٹی آئی کی حمایت یافتہ آزاد امیدوار ریحانہ ڈار کی درخواست پر جسٹس علی باقر نجفی سماعت کریں گے۔ ریحانہ ڈار نے اپنے بیان میں کہا ہے کہ خواجہ آصف نے دھاندلی کی، ثبوت عدالت میں پیش کروں گی۔

درخواست گزار ریحانہ ڈار نے عام انتخابات میں فارم 47 جاری کرنے کے اقدام کو چیلنج کیا ہے، درخواست میں مؤقف اپنایا گیا ہے کہ ریٹرننگ افسران نے قانون کے منافی فارم 47 جاری کیا۔ خواجہ آصف کی کامیابی اور فارم 45 کا نتیجہ بھی لاہور ہائیکورٹ میں چیلنج کیا گیا ہے۔

گزشتہ روز سیالکوٹ میں ریحانہ ڈار کی قیادت میں الیکشن نتائج کے خلاف ریلی نکالی گئی۔ ریلی کے شرکا نے پی ٹی آئی اور قومی پرچم تھام رکھے تھے، ریحانہ ڈار نے ریلی کے دوران کچہری چوک میں میڈیا سے گفتگو کرتے ہوئے کہا کہ عدالت میں قرآن پر فیصلہ ہوگا، میں الیکشن جیت چکی ہوں، سب سے پہلے میں قرآن پاک پر حلف دوں گی۔

ریحانہ ڈار نے کہا کہ دھاندلی کے ویڈیو ثبوت موجود ہیں، تمام ثبوت عدالت میں پیش کروں گی، ڈی پی او، ڈی سی، آر او اور خواجہ آصف کی دھاندلی کی تمام ویڈیوز مجھے موصول ہو چکی ہیں۔ روزانہ اسی طرح احتجاج کروں گی۔ میں نے 65 ہزار کی لیڈ حاصل کی تھی، خواجہ آصف نے آر او کیساتھ مل کر دھاندلی کی۔

یاد رہے کہ 8 فروری کو این اے 71 سیالکوٹ 2 سے مسلم لیگ (ن) کے رہنما خواجہ آصف نے عثمان ڈار کی والدہ ریحانہ ڈار کو شکست دیدی تھی۔ الیکشن کمیشن کے فارم 47 کے مطابق پاکستان مسلم ليگ ن کے خواجہ محمد آصف ایک لاکھ 19 ہزار ایک ووٹ لے کر کامیاب ہوئے جبکہ آزاد امیدوار ریحانہ امتیاز ڈار ایک لاکھ 4 سو 82 ووٹ لیکر دوسرے نمبر پر رہیں۔