چوہدری شجاعت کی اڈیالہ جیل میں پرویز الٰہی سے ملاقات، کیا راز و نیاز ہوئے؟

پاکستان مسلم لیگ ق کے سربراہ چوہدری شجاعت کی اڈیالہ جیل میں چوہدری پرویز الٰہی سے ملاقات ہوئی ہے۔

پاکستان مسلم لیگ ق کے ترجمان مصطفیٰ ملک نے بھی ملاقات کی تصدیق کر دی ہے۔

ذرائع کے مطابق چوہدری شجاعت اور پرویز الٰہی کے درمیان سیاسی امور پر تبادلہ خیال کیا گیا، تاہم ترجمان پاکستان مسلم لیگ کا کہنا ہے کہ ملاقات مکمل غیر سیاسی تھی۔

ترجمان مصطفیٰ ملک کے مطابق ملاقات میں چوہدری وجاہت حسین، چوہدری شافع حسین، چوہدری سالک حسین اور منتہا اشرف بھی شامل تھے۔

چوہدری برادران کی ملاقات کو سیاسی رنگ نہ دیا جائے، ترجمان مسلم لیگ ق

ترجمان نے بتایا کہ ملاقات مکمل غیر سیاسی تھی، اس کو سیاسی رنگ نہ دیا جائے۔

انہوں نے کہاکہ چوہدری شجاعت حسین اور چوہدری پرویز الٰہی میں بہت محبت کا رشتہ ہے اور یہ ملاقات خاندانی روایات کے تحت ہوئی۔

ترجمان نے مزید بتایا کہ چوہدری پرویز الٰہی کی صحت کے حوالے سے چوہدری شجاعت حسین اور فیملی کو تشویش لاحق تھی۔

واضح رہے کہ چوہدری پرویزالٰہی عام انتخابات سے قبل ہی پاکستان مسلم لیگ ق سے علیحدہ ہوکر تحریک انصاف کا حصہ بن گئے تھے۔

چوہدری پرویز الٰہی مختلف کیسز کی وجہ سے انتخابات میں بھی حصہ نہیں لے سکے اور اس وقت اڈیالہ جیل میں قید ہیں۔ ان پر کرپشن سمیت دیگر مقدمات قائم ہیں۔