بالی ووڈ کے اداکار اور ہدایتکار ستیش کوشک کے انتقال کے بعد پارٹی کے مقام سے مشکوک ادوایات ملنے کا انکشاف ہوا ہے۔
غیر ملکی میڈیا کے مطابق بھارتی اداکار ستیش کوشک ہولی کے موقع پر دہلی کے علاقے بجواسن کے ایک فارم ہاؤس میں دیگر اداکاروں کے ساتھ پارٹی میں شریک تھے۔
ستیش کوشک کے انتقال کے بعد بھارتی پولیس نے دعویٰ کیا ہے کہ انہیں اس پارٹی والے کمرے سے مشکوک ادویات ملی ہیں جنہیں ٹیسٹ کے لیے بجھوا دیا گیا ہے۔
پولیس کا کہنا ہے کہ بھارتی اداکار کی پوسٹ مارٹم رپورٹ ابھی آنا باقی ہے جس کے بعد اس بات کا تعین کیا جا سکے گا کہ آیا ان کی موت ان ادویات کے استعمال سے ہوئی ہے یا کسی اور وجہ سے ہوئی۔
یاد رہے کہ اداکار اور ہدایتکار ستیش کوشک دل کا دورہ پڑنے سے جمعرات کی صبح انتقال کر گے تھے۔
بھارتی اداکار کی عمر 66 برس تھی اور ان کی موت کی خبر سب سے پہلے ان کے قریبی دوست انوپم کھیر نے اپنی ٹوئٹ کے ذریعے دی تھی۔
