الیکشن کمیشن آف پاکستان نے وفاقی دارالحکومت اسلام آباد کے حلقہ این اے 46 کے انتخابی نتائج پر اعتراض سے متعلق تحریری فیصلہ جاری کردیا۔
الیکشن کمیشن نے این اے 46 سے مسلم لیگ ن کے امیدوار عقیل انجم کو کامیاب قرار دیتے ہوئے نوٹیفکیشن جاری کر دیا۔ اس حوالے سے الیکشن کمیشن نے آزاد امیدوار عامرمغل کی درخواست مسترد کر دی۔
مزید پڑھیں
واضح رہے کہ اس سے قبل اسلام آباد ہائیکورٹ نے اسلام آباد کے تینوں حلقوں این اے 46، این اے 47 اور این اے 48 سے مسلم لیگ ن کے امیدواروں کی کامیابی کے نوٹیفکیشن معطل کر دیے ہیں۔
یہ بھی یاد رہے کہ 8 فروری کو ملک میں ہونے والے عام انتخابات کے نتائج سامنے آنے کے بعد پاکستان تحریک انصاف سمیت دیگر سیاسی جماعتوں نے الزامات عائد کیے ہیں کہ الیکشن دھاندلی زدہ ہیں۔
سابق کمشنر راولپنڈی نے بھی گزشتہ دنوں ایک پریس کانفرنس کرتے ہوئے کہا تھا کہ راولپنڈی کی نشستوں پر جیتے ہوئے لوگوں کو ہرایا گیا۔ تاہم آج انہوں نے اپنے بیان پر شرمندگی کا اظہار کرتے ہوئے معذرت کر لی ہے اور کہا ہے کہ ایک سیاسی رہنما کے کہنے پر انہوں نے یہ بیان دیا تھا۔
اب حکومت سازی کے لیے جوڑ توڑ کا سلسلہ جاری ہے، مسلم لیگ ن اور پیپلزپارٹی سمیت 6 جماعتوں نے مل کر وفاق میں حکومت بنانے کا فیصلہ کیا ہے، جبکہ پی ٹی آئی کا موقف ہے کہ حکومت بنانا ان کا حق ہے کیونکہ وہ 180 سے زیادہ نشستوں پر جیتے ہوئے ہیں۔
