پاکستان تحریک انصاف (پی ٹی آئی) کے بانی عمران خان کی ہمشیرہ علیمہ خان نے کہا ہے کہ عمران خان نے پیغام دیا ہے جنہوں نے مینڈیٹ اور ووٹ چوری کیے ہیں ان کے ساتھ مفاہمت نہیں ہوگی۔
مزید پڑھیں
اڈیالہ جیل کے باہر میڈیا سے گفتگو کرتے ہوئے انہوں نے کہا کہ عمران خان کا کہنا تھا کہ اگر آج ایسا کام کیا تو معاشرے کو بہت زیادہ نقصان پہنچے گا۔ انہوں نے کہا کہ اس بات کا مطلب یہ ہے کہ تمام جیلوں کے دروازے کھول دینے چاہئیں اور جن لوگوں نے چوری کی ہے، ان کے ساتھ مفاہمت کر لی جائے اور اس طرح سارے چوروں کو نکال دیں۔
علیمہ خان نے بتایا کہ عمران خان چاہتے ہیں مفاہمت ہو بالکل اس طرح جیسے نیلسن منڈیلا نے مفاہمت کی تھی، جنہوں نے ووٹ چوری کیے ہیں ان کے ساتھ مفاہمت نہیں ہوگی، اگر چوروں سے مفاہمت کرنی ہے تو جیلوں کے دروازے کھول دیں۔
انہوں نے کہا کہ پچھلے ایک سال سے نمل یونیورسٹی کا پروجیکٹ جاری تھا جس میں 2 ہزار طلبا اور 180 فیکلٹی ممبران کی رہائش کے لیے تعمیر کی جا رہی تھی، علاوہ ازیں پورے شہر میں تعمیر شروع کی جانی تھی لیکن 9 مئی کے بعد سارے ٹھیکے داروں کو بھگا دیا گیا۔
انہوں نے کہا کہ یہ ایک فلاحی ادارہ ہے جہاں 95 فیصد بچے اسکالر شپ پر پڑھ رہے ہیں، اگر تعمیر مکمل ہوتی تو 2 ہزار طلبہ کو اگلے ایک 2 سال میں داخلے دے سکتے تھے، اب ہماری کوشش تھی کہ اب صرف 200 طالبعلموں کے لیے رہائش گاہیں بنالیں، وزیراعلیٰ کی ذمہ داری ہے کہ اب کوئی ٹھیکے داروں کو تنگ نہ کرے اگر کوئی تنگ کرے گا تو خبردار کرتے ہیں ہم یونیورسٹی کے باہر احتجاج کریں گے۔
