صدارتی الیکشن ملتوی کیے جائیں، سنی اتحاد کونسل کے امیدوار محمود خان اچکزئی کا الیکشن کمیشن کو خط

سنی اتحاد کونسل کے صدارتی امیدوار محمود خان اچکزئی نے چیف الیکشن کمشنر کو خط لکھا ہے کہ مخصوص نشستوں کا معاملہ حل ہونے تک صدارتی الیکشن ملتوی کیا جائے۔

صدارتی امیدوار محمود اچکزئی کی جانب سے الیکشن کمیشن کو لکھے گئے خط میں کہا گیا ہے کہ قومی اور صوبائی اسمبلیوں کی متعدد مخصوص نشستیں ابھی خالی ہیں، الیکٹورل کالج مکمل ہونے تک الیکشن ملتوی کیا جائے۔ مخصوص نشستوں کے بغیر صدارتی انتخابات کرانا آئین و قانون کیخلاف ہے۔

خط میں کہا گیا ہے کہ مخصوص نشستوں کا فیصلہ کیے بغیر الیکٹورل کالج پورا نہیں ہوگا، مخصوص نشستوں کے معاملے پر سنی اتحاد کونسل نے عدالت سے بھی رجوع کر رکھا ہے، سنی اتحاد کونسل کو معاملے پر عدالت سے حق میں فیصلہ آنے کی امید ہے، الیکٹورل کالج پورا ہوئے بغیر صدارتی انتخاب کرانا غیر قانونی ہوگا۔

صدارتی الیکشن کل

واضح رہے کہ کل بروز ہفتہ 9مارچ کو صدارتی الیکشن کا انعقاد ہوا رہا ہے، مسلم لیگ ن اور ان کے اتحادیوں کی جانب سے پیپلز پارٹی کے آصف علی زرداری جب کہ سنی اتحادکونسل اور ان کی اتحادی پارٹیوں کی جانب سے محمود خان اچکزئی صدراتی امیدوار ہیں۔