مجھے کارکن نہ بتائیں کہ میں کس کے ساتھ بیٹھوں اور کس کے ساتھ نہیں، شیر افضل مروت

پی ٹی آئی رہنما شیر افضل مروت نے کہا ہے کہ صحافی مبشر لقمان نے میرے سامنے کسی کو گالی نہیں دی، وہ اس وقت سے میرے کلائنٹ تھے جب ان کا لگاؤ تحریک انصاف کے ساتھ تھا، لہٰذا مجھے پی ٹی آئی کارکن نہ بتائیں کہ میں کس کے ساتھ بیٹھوں اور کس کے ساتھ نہیں۔

شیر افضل مروت اسلام آباد میں میڈیا سے گفتگو کر رہے تھے کہ ایک صحافی نے ان سے سوال کیا کہ آپ کی ایک تصویر صحافی مبشر لقمان کے ساتھ وائرل ہو رہی ہے۔ پی ٹی آئی کارکنان کا اعتراض ہے کہ ممبر قومی اسمبلی بننے سے قبل آپ عمران خان اور ان کی اہلیہ کے خلاف بات کرنے والوں کا گریبان پکڑ لیتے تھے اور اب ان کے ساتھ بیٹھتے ہیں۔

مبشر لقمان کے ساتھ میرا انٹرویو تھا اسطرح نہ کریں کہ ورکر ہمارے باپ بننا شروع ہو جائیں مجھے پتہ میری حدود کیا ہیں۔ شیر افضل مروت pic.twitter.com/frZxOBb2HB

— Rubab Hayat (@shuglisam) March 15, 2024

سوال کے جواب میں شیر افضل مروت نے کہا کہ سب کارکنان کان کھول کر سن لیں 30 برس سے شعبہ وکالت سے منسلک ہوں، مبشر لقمان کی 8 برس تک وکالت کی ہے، اگر کسی کے ساتھ میرا پرانا تعلق ہے تو کوئی میرے ان کے ساتھ بیٹھنے پر اعتراض نہ کرے۔

مبشر لقمان کی زیادہ آڈینس پٹواری ہے، میں نے تو انہیں انٹرویو دے کر اپنی بات اور اپنے کپتان کا مؤقف پہنچایا ہے۔ وہ کبھی میرے خلاف کسی بھی کمپین کا حصہ نہیں بنے، نہ ہی میرے سامنے انہوں نے عمران خان کے خلاف بات کی ہے، تو ہمارے کارکن میرے باپ مت بنیں کہ وہ میری انگلی پکڑ کر بتائیں کہ میں کیا کروں اور کس ساتھ بیٹھوں یا نہ بیٹھوں؟