بلوچستان کے ضلع کیچ کی تحصیل تربت میں دہشتگردوں کی جانب سے ایئرپورٹ میں داخل ہوکر دہشتگردی کی کوشش ناکام بنا دی گئی۔ سیکیورٹی فورسز نے چاروں دہشتگردوں کو ہلاک کردیا۔
رپورٹس کے مطابق نامعلوم مسلح افراد نے تربت ایئرپورٹ پر داخل ہونے کی کوشش کی، اور اس موقع پر فائرنگ بھی کی گئی تاہم سیکیورٹی فورسز نے دہشتگرد عناصر سے نمٹنے کے لیے بروقت کارروائی عمل میں لائی۔
مزید پڑھیں
ڈی ایس پی تربت چاکر حیات کے مطابق سیکیورٹی فورسز نے حملہ آوروں کو ایئرپورٹ میں داخل ہونے سے روکنے کے لیے فائرنگ کی جس کے نتیجے میں 4 مشتبہ دہشتگرد ہلاک ہو گئے جبکہ اس دوران کوئی اور جانی یا مالی نقصان نہیں ہوا۔
دوسری جانب سیکیورٹی فورسز کی جانب سے ایئرپورٹ میں کلیئرنس آپریشن کا سلسلہ جاری ہے، جبکہ قریب کے اسپتالوں میں ایمرجنسی نافذ کر دی گئی ہے۔
عینی شاہدین کے مطابق دھماکوں اور فائرنگ سے اطراف کی عمارتوں کے شیشے ٹوٹ گئے اور خوف و ہراس پھیل گیا۔
دوسری جانب بلوچ علیحدگی پسند تنظیم بلوچ لبریشن آرمی (بی ایل اے) کے ونگ مجید بریگیڈ نے حملے کی ذمہ داری قبول کر لی ہے۔
واضح رہے کہ چند روز قبل گوادر میں بلوچ لبریشن آرمی (بی ایل اے) کی جانب سے گوادر پورٹ اتھارٹی کمپلیکس پر حملہ کیا گیا تھا، تاہم سیکیورٹی فورسز نے بروقت کارروائی کرتے ہوئے 8 حملہ آوروں کو ہلاک کر دیا تھا۔