وزیر اعلیٰ خیبر پختونخوا علی امین خان گنڈاپور سے ملاقات میں وزیر داخلہ محسن نقوی نے صوبے میں امن و امان سے متعلق معاملات پر تبادلہ خیال کیا اور صوبے میں امن و امان کی صورتحال کو بہتر بنانے کے لیے وفاقی اور صوبائی سطح پر قانون نافذ کرنے والے اداروں کے درمیان کوآرڈینیشن کو بہتر بنانے پر اتفاق کیا۔
وزیر اعلیٰ ہاؤس پشاور پہنچنے پر وفاقی وزیر داخلہ محسن نقوی کا استقبال وزیر اعلیٰ خیبرپختونخوا علی امین گنڈاپور نے انہیں گلے لگا کر کیا، دونوں رہنماؤں کی ملاقات بظاہر دوستانہ اور خوشگوار ماحول میں ہوئی۔
ملاقات میں گزشتہ روز چینی باشندوں پر حملے کی مذمت کرتے ہوئے دونوں رہنماؤں نے چینی حکومت اور ہلاک شدگان کے خاندانوں سے اظہار ہمدردی کیا، دونوں رہنماؤں نے دہشت گردی کے اس واقعہ میں ملوث عناصر کو کیفر کردار تک پہنچانے اور دہشت گردی کو ختم کرنے کے عزم کا بھی اظہار کیا۔
اس موقع پر وزیر اعلیٰ خیبرپختونخوا علی امین گنڈاپور کا کہنا تھا کہ امن وامان صوبائی حکومت کی ترجیحات میں سر فہرست ہے، لوگوں کے جان و مال کے تحفظ کو یقینی بنانا اولین مقصد ہے، صوبے میں پولیس اور دیگر قانون نافذ کرنے والے اداروں کو مضبوط بنایا جائے گا۔
وزیر اعلیٰ خیبرپختونخوا کے مطابق اس مقصد کے لیے ایک مربوط حکمت عملی کے تحت اقدامات اٹھائے جائیں گے، خیبر پختونخوا دہشت گردی سے سب سے زیادہ متاثر ہوا ہے، خیبر پختونخوا دہشت گردی کے خلاف جنگ میں فرنٹ لائن صوبہ ہے۔
