خیبرپختونخوا حکومت نے صوبے کے مستحق افراد اور پولیس شہداء کے خاندانوں کے لیے عید پیکیج کی منظوری دے دی ہے۔
وزیر اعلیٰ خیبر پختونخوا علی امین گنڈاپور کی زیر صدارت صوبائی کابینہ کا دوسرا اجلاس ہوا، اجلاس میں صوبائی کابینہ اراکین، چیف سیکیریٹری، آئی جی پولیس اور متعلقہ انتظامی سیکیریٹریز نے شرکت کی۔
مزید پڑھیں
اجلاس میں خیبر پختونخوا میں ضم قبائلی اضلاع میں پولیس کو گاڑیوں اور دیگر جدید آلات کی فراہمی کے لیے نان اے ڈی پی اسکیم کی منظوری دی گئی،اسکیم کے تحت ضم اضلاع میں پولیس کے لیے 7.67 ارب روپے کی لاگت سے گاڑیاں اور جدید آلات خریدے جائیں گے۔
اجلاس میں صوبے میں مستحق افراد اور شہدا کے خاندانوں کو عید پیکیج دینے کی منظوری بھی دی گئی، پیکیج کے تحت صوبائی اسمبلی کے ہر حلقے میں ایک ہزار مستحق افراد کو 10، 10 ہزار روپے دیے جائیں گے،اس پیکیج پر 1.15 ارب روپے لاگت آئے گی، 2050 پولیس شہداء کے خاندانوں کو بھی 10، 10 ہزار روپے عید پیکیج دیا جائے گا۔
صوبائی کابینہ نے سرکاری محکموں میں بھرتیوں کے لیے نجی ٹیسٹنگ ایجنسیوں سے اسکریننگ ٹیسٹ لینے کے معاملے پر کمیٹی تشکیل بھی تشکیل دی ہے، یہ کمیٹی 15 دنوں میں سرکاری ٹیسٹنگ ایجنسیوں کی استعداد بڑھانے سمیت دیگر متعلقہ معاملات پر حتمی سفارشات پیش کرے گی، کابینہ اجلاس میں ڈیجیٹل رائٹ آف وے پالیسی کی بھی منظوری دی گئی۔
وزیر اعلی خیبر پختونخوا علی امین گنڈاپور کی زیر صدارت صوبائی کابینہ کا دوسرا اجلاس۔
ضم اضلاع میں پولیس کو گاڑیوں اور دیگر جدید آلات کی فراہمی کے لئے نان اے ڈی پی اسکیم کی منظوری۔ pic.twitter.com/ACZU6Ax8Na
— KP Updates (@KPKUpdates) March 29, 2024
اجلاس میں صوبے میں پاکستان ڈیجیٹل سٹی کے قیام کے لیے انفارمیشن ٹیکنالوجی بورڈ اور اسپیشل ٹیکنالوجی زون اتھارٹی کے درمیان معاہدے کی بھی منظوری دی گئی۔
اجلاس میں چیف ایگزیکٹو آفیسر اور ایگزیکٹو کمیٹی ممبران پیڈو کی تعیناتی کے لیے رولز کی منظوری دے دی گئی ہے۔
