صدر مملکت آصف علی زرداری نے پاکستان اور ایران کے باہمی فائدے کے لیے بارٹر تجارتی اور اقتصادی تعلقات کو فروغ دینے کی ضرورت پر زور دیتے ہوئے کہا ہے کہ دونوں ممالک کے درمیان مختلف شعبوں میں دو طرفہ اقتصادی تعاون کو وسعت دینے کی وسیع گنجائش موجود ہے۔
مزید پڑھیں
آصف علی زرداری نے ان خیالات کا اظہار پاکستان میں ایران کے سفیر ڈاکٹر رضا امیری مقدم سے گفتگو کرتے ہوئے کیا جنہوں نے جمعے کو ایوان صدر میں ان سے ملاقات کی۔
صدر مملکت نے دونوں برادر ممالک کے درمیان دوطرفہ تعلقات کو مزید مستحکم کرنے کے عزم کا اظہار کیا۔
انہوں نے دونوں ممالک کو درپیش مشترکہ چیلنجوں پر قابو پانے کے لیے مل کر کام کرنے پر زور دیا۔
ایرانی سفیر نے صدر مملکت کو عہدہ سنبھالنے پر مبارکباد دیتے ہوئے کہا کہ ایران اور پاکستان دونوں کے درمیان تاریخی، مذہبی اور ثقافتی رشتے ہیں جو وقت کے ساتھ ساتھ مزید مضبوط ہو رہے ہیں۔
ڈاکٹر رضا امیری مقدم نے دونوں ممالک کے درمیان دوطرفہ تجارتی حجم، بینکنگ تعاون اور فضائی اور کاروباری روابط بڑھانے کی ضرورت پر زور دیا۔ ایرانی سفیر نے مزید کہا کہ پاکستان چاہ بہا زاہدان ریل روڈ سے وسطی ایشیا، یورپ اور ترکی کے ساتھ تجارت کے لیے فائدہ اٹھا سکتا ہے۔
انہوں نے امید ظاہر کی کہ صدر آصف علی زرداری کی قیادت میں پاک ایران تعلقات کو نئی تحریک ملے گی۔
انہوں نے ایرانی صدر ڈاکٹر سید ابراہیم رئیسی کی جانب سے صدر پاکستان کے لیے تہنیتی پیغام بھی پہنچایا۔
