فرنٹیئر ورکس آرگنائزیشن(ایف ڈبلیو او) نے خنجراب پاس پر ریسیکیو آپریشن مکمل کر کے سڑک ٹریفک کے لیے کھول کر برفانی تودے میں پھنسے سیاحوں کو محفوظ مقام پر منتقل کردیا ہے۔
ایف ڈبلیو اور کے مطابق 14 گزشتہ روز خنجراب پاس سے 30 کلومیٹر کے فاصلے پر ایک برفانی تودہ گرنے سے سڑک ہر قسم کی ٹریفک کے لیے بند ہو گئی تھی، برفانی تودے کی لمبائی 150 میٹر اور اونچائی 25 میٹر تھی۔
مزید پڑھیں
برفانی تودہ گرنے سے خنجراب پاس جانے والی 60 سے زائد گاڑیاں اور 180 سے زائد زائرین اور سیاح خاندان پھنس گئے تھے، ایف ڈبلیو او کی ٹیم کو بھاری مشینری کے ساتھ فوری طور پر برفانی تودے کو ہٹانے کے لیے کام پر لگا دیا گیا، پاک فوج کے میڈیکل اسٹاف نے بھی پھنسے متاثرین کو طبی امداد فراہم کی۔
شدید سرد موسم کے باعث پھنسے ہوئے سیاحوں خاص طور پر خواتین اور بچوں کو صحت کے متعلق سنگین خطرات لاحق تھے،سیاحوں کو سردی سے بچانے اور طبی امداد فراہم کرنے کے لیے عارضی رہائش کا بھی انتظام کیا گیا۔
خنجراب پاس پر ایف ڈبلیو او کا ریسکیو آپریشن۔ ایف ڈبلیو او کی ٹیم نے لگاتار کام کرکے برفانی تودہ ہٹانے کا کام مکمل کیا۔ خنجراب پاس جانے والی 60 سے زائد گاڑیاں اور 180 سے زائد زائرین اور سیاح خاندان پھنس گئے تھے جنہیں باحفاظت ریسکیو کر لیا گیا۔#WENews #PakArmy #Khunjerab pic.twitter.com/qVoZIR3J5s
— WE News (@WENewsPk) April 15, 2024
برفانی تودے کے دونوں جانب 48 متاثرہ مریضوں کو ایف ڈبلیو او کے ڈاکٹروں اور پیرامیڈیکس کے عملے نے ابتدائی طبی امداد فراہم کی، ایف ڈبلیو او کی جانب سے متاثرہ سیاحوں کو کھانا اور پینے کا صاف پانی بھی پہنچایا گیا
سردی سے متاثرہ 30 سے زائد مریضوں کو ایف ڈبلیو او کے میڈیکل روم میں طبی امداد مہیا کی گئی ، سخت موسم اور حالات کے باوجود بھی ٹریفک کی روانی کے لیے کام رات کے وقت جاری رہا، ایف ڈبلیو او کی ٹیم نے لگاتار کام کرکے برفانی تودہ ہٹانے کا کام مکمل کیا اور سڑک کو ٹریفک کے لیے بحال کیا۔
برفانی تودہ ہٹانے اور سڑک کو کھولنے کے بعد، تمام پھنسے ہوئے سیاحوں کو سوست میں محفوظ علاقے میں منتقل کر دیا گیا ہے۔
