وزیراعظم پاکستان شہباز شریف نے کہا ہے کہ سعودی وزیر خارجہ شہزادہ فیصل بن فرحان کی سربراہی میں سعودی وفد کے دورہ پاکستان کا خیرمقدم کرتے ہیں۔
سعودی وزیر خارجہ اور وفد کے اعزاز میں دیے گئے عشائیہ کے موقع پر خطاب کرتے ہوئے وزیراعظم نے کہاکہ سعودی وفد کی پاکستان آمد پر بہت خوشی ہوئی۔ ہم پاکستان میں وفد بھیجنے پر سعودی ولی عہد کے شکر گزار ہیں۔
مزید پڑھیں
انہوں نے کہاکہ یہ دورہ دوطرفہ تعلقات کو بڑھانے میں اہم کردار ادا کرے گا۔ آج کی گفتگو دونوں ملکوں کے درمیان نئے ادوار کا آغاز کرے گی۔ ایس آئی ایف سی کی ایپکس کمیٹی کے تحت سرمایہ کاری کے مواقع بڑھیں گے۔
شہباز شریف نے کہاکہ پورا پاکستان سعودی ولی عہد شہزادہ محمد بن سلمان کے دورے کا منتظر ہے۔
حکومت اور عوام کی طرف سے پرجوش استقبال پر مشکور ہوں، سعودی وزیر خارجہ
اس موقع پر سعودی وزیر خارجہ شہزادہ فیصل بن فرحان نے کہاکہ حکومت اور عوام کی طرف سے پرجوش استقبال پر مشکور ہوں، ایسی مہمان نوازی کو بھلایا نہیں جا سکتا۔
واضح رہے کہ سعودی عرب کے وزیر خارجہ کی سربراہی میں اعلیٰ سطح کا وفد گزشتہ روز پاکستان پہنچا تھا، وزیر خارجہ نے صدر مملکت آصف علی زرداری اور وزیراعظم شہباز شریف سے ملاقاتیں کی ہیں۔
اس کے علاوہ سعودی وزیر خارجہ نے اپنے ہم منصب اسحاق ڈار کے ہمراہ مشترکہ پریس کانفرنس کرتے ہوئے کہاکہ پاکستان کا دورہ مفید ثابت ہوا، سرمایہ کاری کے حوالے سے ابتدائی بات چیت ہوئی ہے۔
