پاکستان کرکٹ ٹیم کے بیٹر اعظم خان دائیں گھٹنے اور کالف مسل کی تکلیف میں مبتلا ہوگئے، گزشتہ روز ٹریننگ سیشن کے دوران تکلیف کا شکار ہوئے۔ تاہم انجری کے باعث نیوزی لینڈ کے خلاف ٹی20 سیریز میں ان کی شرکت مشکوک ہوگئی ہے۔
مزید پڑھیں
پاکستان کرکٹ بورڈ (پی سی بی) کی میڈیکل ٹیم اعظم خان کی دیکھ بھال کررہی ہے۔ اعظم خان کی نیوزی لینڈ کے خلاف میچوں میں شرکت کا فیصلہ میڈیکل رپورٹس کے نتائج کی بنیاد پر کیا جائے گا۔
پاکستان اور نیوزی لینڈ کی سیریز
پاکستان اور نیوزی لینڈ کے درمیان سیریز کا پہلا میچ آج شام 7 بجے راولپنڈی کرکٹ اسٹیڈیم میں کھیلا جائے گا، تاہم موسم کی صورتحال کے باعث بارش سے میچ متاثر ہونے کا خدشہ بھی ظاہر کیا جا رہا ہے۔
اس دوران اعظم خان کی انجری ان کو آج کا میچ کھیلنے سے روک سکتی ہے۔ آج کے میچ میں ان کے علاوہ کپتان بابر اعظم، شاہین شاہ آفریدی، شاداب خان، فخر زمان، عثمان خان، محمد عامر، عماد وسیم ، محمد رضوان، صائم ایوب، افتخار احمد اور نسیم شاہ ٹیم کا حصہ ہوں گے۔
واضح رہے گزشتہ روز قومی ٹیم کے کپتان بابر اعظم نے کہا تھا کہ نیوزی لینڈ کے خلاف سیریز میں نئے کھلاڑیوں کو مواقع دیں گے، نوجوان کھلاڑی باصلاحیت ہیں امید ہے اچھا پرفارم کریں گے۔ میچ میں نئے کامبی نیشن بھی آزمائیں گے۔ یہ سیریز ورلڈ کپ کے لیے پریکٹس فراہم کرے گی۔
