کراچی کے علاقے ڈیفنس میں دوست نے دوست کو گولیاں مار کر قتل کردیا۔
کراچی کے تھانہ درخشاں میں ملزم فہد خان کے خلاف قتل اور اقدامِ قتل کی دفعات کے تحت مقدمہ درج کرلیا گیا ہے۔
مقدمہ میں مدعی ہمام جاوید بتاتے ہیں کہ ہم دوست احمد زمان، ثاقب، آصف اور فہد خان، ہمایوں داؤد کے ساتھ بیٹھے تھے کہ اس دوران فہد خان اور ہمایوں داؤد میں تلخ کلامی ہوئی اور بات ہاتھاپائی تک پہنچ گئی۔
مزید پڑھیں
ہمام جاوید کے مطابق دوستوں نے معاملے کو حل کروایا اور جانے لگے تو اسی دوران فہد خان اچانک آیا اور ہمایوں داؤد کی گاڑی پر فائرنگ کردی۔
مقدمہ کے مطابق فائرنگ سے ہمام جاوید اور ہمایوں داؤد زخمی ہوئے اور گھر روانہ ہوگئے تو فہد خان پھر اپنی گاڑی میں آیا اور ہمایوں کی گاڑی کو ٹکر مار دی جس کے بعد فہد خان گاڑی سے اترا اور ہمایوں پر فائرنگ شروع کردی۔ ’فہدخان ہمایوں داؤد پر فائرنگ کرتا ہوا فرار ہوگیا، فائرنگ کی آواز سن کر ہمایوں داؤد کی اہلیہ اور والدہ گھر سے باہر آگئیں‘۔
پولیس کے مطابق ہمایوں کو پہلے نجی اسپتال اور پھرجناح اسپتال لایا گیا مگر وہ دم توڑ چکا تھا، واقعہ ذاتی رنجش کا معلوم ہوتا ہے۔
پولیس کا کہنا ہے کہ ملزم فہد خان اپنے اہل خانہ کے ہمراہ فرار ہوگیا ہے اور اس کی تلاش جاری ہے۔
پولیس کے مطابق مقتول اور قاتل دونوں بزنس مین ہیں، جائے وقوعہ سے نائن ایم ایم پستول کی گولیوں کے 15 سے زیادہ خول ملے ہیں۔
پولیس کی اب تک کی تفتیش
پولیس کے مطابق ملزم فہد کی گرفتاری کے لیےچھاپے کے دوران ملزم کی گاڑی مل گئی ہے، ملزم فہد نے اپنی گاڑی سے مقتول ہمایوں خان کی گاڑی کو ٹکر ماری تھی۔
پولیس نے بتایا کہ ملزم فہد اپنی گاڑی خیابان اتحاد ہلال پارک کے قریب چھوڑ کر فرار ہوگیا ہے۔
پولیس کے مطابق دونوں دوستوں کے درمیان پرانا تنازع چل رہا تھا جس پر فائرنگ کا واقعہ پیش آیا، جبکہ مقتول اور ملزم دونوں کے دوستوں سے پوچھ گچھ بھی کی جارہی ہے۔
