ایرانی صدر ابراہیم رئیسی کی گورنر سندھ کامران ٹیسوری سے وزیراعلیٰ ہاؤس میں ملاقات ہوئی۔
دونوں رہنماؤں کے درمیان باہمی دلچسپی کے امور سمیت مختلف معاملات پر تبادلہ خیال ہوا۔
اس موقع پر ایرانی صدر اور گورنر سندھ نے دونوں ممالک کے مابین ثقافتی تبادلہ بڑھانے پر حامی بھری، گورنر سندھ نے ایرانی صدر ابراہیم رئیسی کوپی ایچ ڈی کی اعزازی ڈگری بھی دی۔
مزید پڑھیں
گورنرسندھ کامران خان ٹیسوری نے کہاکہ پاکستان اور ایران کے درمیان تاریخی تعلقات ہیں، ایران کے صدر کو اعزازی ڈگری دینا جامعہ کراچی کے لیے اعزاز ہے۔
انہوں نے کہاکہ پاک ایران سفارتی تعلقات کئی دہائیوں پر مشتمل ہیں، کوشش اور خواہش یہ ہے کہ مسلم ممالک کے درمیان مثالی تعلقات قائم ہوں، ایران اور پاکستان کے تعلقات کو مزید مضبوط کرنا چاہتا ہوں۔
گورنر سندھ کامران ٹیسوری کا مزید کہنا تھا کہ ایران کے کئی صوبوں کا دورہ کرکےتاجروں اور صنعت کاروں سے ملاقات کرچکا ہوں، ایرانی سرمایہ کاروں کو سرمایہ کاری کی دعوت دیتا ہوں، وہ یہاں سازگار ماحول سے فائدہ اٹھائیں۔
اس موقع پر ایرانی صدرنےسندھ میں بہترین مہمان نوازی پر گورنر سندھ کا شکریہ ادا کیا۔
واضح رہے کہ ایرانی صدر کے دورہ پاکستان کا آج آخری روز ہے، وہ کل صبح واپس ایران روانہ ہو جائیں گے۔
