نوجوان رکن قومی اسمبلی جمال رئیسانی کے پاس کون کون سی گاڑیاں ہیں؟

چند روز قبل سوشل میڈیا پر ایک ویڈیو صارفین کے تبصروں کی زینت بنی رہی جس میں بلوچستان سے تعلق رکھنے والے نوجوان رکن قومی اسمبلی جمال رئیسانی ایک آرام دہ اور خوبصورت گاڑی میں اسمبلی پہنچے۔ نوجوان رکن اسمبلی کی یہ ویڈیو چند ہی لمحوں میں وائرل ہوگئی۔ کئی لوگوں نے ویڈیو کو دیکھ کر جمال رئیسانی کو تنقید کا نشانہ بنایا جبکہ کئی صارفین نے یہ تبصرے شروع کر دیے کہ جمال رئیسانی کے پاس اس کے علاوہ کون کون سی گاڑیاں ہیں۔

وی نیوز سے بات کرتے ہوئے رکن قومی اسمبلی جمالی رئیسانی نے بتایا کہ حال ہی میں پارلیمان آتے ہوئے میری ویڈیؤ وائرل ہو جس پر کچھ لوگوں نے تنقید کی ہے لیکن بات یہ ہے کہ میں گاڑیوں کا بہت شوقین ہوں اور نئی گاڑیوں کو جمع کرنا میرا مشغلہ ہے۔ انہوں نے کہا کہ جس گاڑی میں وہ پارلیمنٹ گئے تھے وہ کچھ ہی عرصہ قبل انہوں نے خریدی ہے۔ اس گاڑی کا ماڈل بی ایم ڈبلیو آئی سیون ہے، اور یہ گاڑی الیکٹرانک ہونے کی وجہ سے مکمل طور پر ماحول دوست ہے۔

وی نیوز سے بات کرتے ہوئے جمال رئیسانی نے بتایا کہ ’میرے پاس 7 سے 8 گاڑیاں موجود ہیں جن میں فور ویل اور ونٹیج گاڑیاں بھی شامل ہیں۔ میری گاڑیوں کی کلیکشن میں بی ایم ڈبلیو، لینڈ کروزر، مرسیڈیز، کوپے، رینج روور، ولوہ، ڈوج اور لیکسز شامل ہیں۔ میری کار کلیکشن کی زیادہ گاڑیاں اسلام آباد میں موجود ہیں جبکہ کوئٹہ میں لینڈ کروزر استعمال کرنا پسند کرتا ہوں‘۔

جمال رئیسانی نے کہا کہ ہر نوجوان کی طرح وہ بھی گاڑیوں کو جمع کرنے کا شوق رکھتے ہیں اور مستقبل میں مزید گاڑیاں اپنی کلیکشن کا حصہ بنائیں گے۔