سیکیورٹی فورسز نے خیبرپختونخوا کے ضلع خیبر میں خفیہ اطلاعات کی بنیاد پر آپریشن کرتے ہوئے 4 دہشتگردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خفیہ اطلاعات کی بنیاد پر چھاپہ مارا تو دہشتگردوں کے ساتھ فائرنگ کا تبادلہ ہوگیا۔
مزید پڑھیں
آئی ایس پی آر کے مطابق سیکیورٹی فورسز نے فائرنگ کے دوران 4 دہشتگردوں کو ہلاک کردیا جن میں قاری واجد، قاری بریال اور رازق بھی شامل ہیں۔
ترجمان نے بتایا کہ آپریشن کے دوران دہشتگردوں کے ٹھکانے کو بھی تباہ کردیا گیا اور وہاں سے بھاری مقدار میں اسلحہ، گولہ بارود اور دھماکا خیز مواد برآمد ہوا۔
آئی ایس پی آر کے مطابق علاقے میں دہشتگردوں کے خاتمے کے لیے کلیئرنس آپریشن جاری ہے۔
ترجمان نے کہاکہ اہل علاقہ نے دہشتگردوں کے خلاف سیکیورٹی فورسز کے آپریشن کو سراہا ہے۔ فورسز ملک سے دہشتگردی کی لعنت ختم کرنے کے لیے پرعزم ہیں۔
