پاکستان نے دہشت گردی کے حالیہ واقعات کے پیش نظر پاک افغان بارڈر پر تمام عالمی قوانین نافذ کرنے کا عندیہ دیا ہے۔
وزیر دفاع خواجہ آصف نے اپنے ایک بیان میں کہا ہے کہ دہشتگردی کے واقعات میں اضافہ ہو رہا ہے، جس کے پیش نظر ضروری ہے کہ بارڈر پر بنیادی تبدیلی کی جائے۔
مزید پڑھیں
خواجہ آصف نے کہاکہ ہمیں پاک افغان بارڈر پر تمام عالمی قوانین نافذ کرنا ہوں گے۔ کیونکہ افغانستان سے ہوکر پاکستان میں دہشتگردی کی کارروائیاں ہو رہی ہیں۔
انہوں نے کہاکہ کابل کی جانب سے ہماری کوششوں کے باوجود کوئی پیشرفت نہیں کی جا رہی۔
خواجہ آصف نے کہاکہ افغان سرزمین پاکستان کے خلاف دہشتگردی کے لیے استعمال ہو رہی ہے اور یہ سب کابل کے علم میں ہے۔
وزیر دفاع کا کہنا تھا کہ پاک افغان بارڈر دنیا بھر کے روایتی بارڈرز سے مختلف ہے، مگر اب ضروری ہے کہ دہشتگردوں کی آزادانہ نقل و حمل کو روکا جائے۔
واضح رہے کہ دہشتگردی کی حالیہ لہر کا معاملہ پاکستان کی جانب سے افغانستان کے ساتھ اٹھایا گیا ہے، مگر افغانستان ٹی ٹی پی کو روکنے کے لیے کوئی عملی اقدامات نہیں کررہا۔
