قومی احتساب بیورو (نیب) نے سابق وزیر اعظم عمران خان کی اہلیہ بشرٰی بی بی سے توشہ خانے کے تحائف رکھنے کی تفصیل مانگتے ہوئے کل طلب کر لیا۔
میڈیا رپورٹس کے مطابق نیب نے سابق وزیر اعظم عمران خان کی اہلیہ کو 21 مارچ کو نیب میں پیش ہونے کے لیے نوٹس بھیجا ہے۔
نیب کی ٹیم بشرٰی بی بی کو نوٹس وصول کروانے زمان پارک گئی اور سوالنامہ بشرٰی بی بی کے حوالے کیا۔ سوالنامہ میں بشرٰی بی بی سے بیرون ملک دوروں کے دوران ملنے والے تحائف رکھنے کی تفصیل طلب کی گئی ہے۔
نیب نوٹس میں کہا گیاہے کہ پہلے بھی بشرٰی بی بی کونوٹس دیا لیکن کوئی جواب نہیں دیاگیا۔ نوٹس میں کہاگیاہے کہ بشرٰی بی بی کو بیرون ملک دوروں پر بہت سارے تحائف ملے۔ امیر قطر کی جانب سے رولیکس گھڑی، ایک لاکٹ چین، گولڈ ڈائمنڈ، انگوٹھی، بریسلٹ ملی۔ مئی 2021 میں سعودی شہزادے کی جانب سے ہار دیاگیا۔
اس سے قبل گزشتہ ماہ نیب نے بشری بی بی کو توشہ خانہ سے لیے گئے تحفوں کی تفصیل کے ساتھ نیب راولپنڈی میں پیش ہونے کے لیے نوٹس بھیجا تھا۔ تاہم بشرٰی بی بی نیب میں پیش نہیں ہوئیں تھیں۔
