وزیراعظم شہباز شریف نے صوبائی حکومتوں کو ہدایت کی ہے کہ وہ پیٹرولیم مصنوعات کی قیمتوں میں کمی اور اشیائے خور و نوش کے سرکاری نرخوں پر عملدرآمد یقینی بنانے کے لیے اقدامات کریں۔
مزید پڑھیں
وزیر اعظم آفس کے میڈیا ونگ سے جاری بیان کے مطابق وزیر اعظم شہباز شریف نے مہنگائی میں کمی کو عوام کے لیے اچھی خبر قرار دیتے ہوئے کہا کہ 2 سال میں مہنگائی کا کم ترین سطح پر آنا معاشی بہتری کا ثبوت ہے۔
شہباز شریف نے کہا کہ مہنگائی کی شرح 39 فیصد سے پہلے 20 فیصد اور اب 17 فیصد پر آگئی ہے۔ انہوں نے مزید کہا کہ 16 ماہ میں جو محنت کی گئی اسے نگراں حکومت نے جاری رکھا اور یہ سب اسی کے ثمرات ہیں۔
وزیر اعظم نے کہا کہ معاشی سرگرمیوں میں تیزی سے عوام کو مزید ریلیف ملے گا اور پیٹرول کی قیمتوں میں کمی سے بھی عوام تک اس کا فائدہ منتقل ہوگا۔
انہوں نے کہا کہ اللہ تعالی کے فضل وکرم سے اسی سمت میں چلتے رہنے سے عوام کی زندگیوں میں مزید بہتری ہوگی، سرتوڑ کوشش کر رہے ہیں کہ عوام کو جلد سے جلد زیادہ سے زیادہ ریلیف مل سکے۔
قبل ازیں ادارہ شماریات نے ملک میں مہنگائی سے متعلق ماہانہ رپورٹ جاری کی تھی جس کے مطابق مارچ 2024 کے مقابلے اپریل میں مہنگائی 0.43 فیصد کم ہوئی ہے۔ اعدادوشمار کے مطابق مہنگائی اپریل میں مہنگائی کم ہوکر اب 17.34 فیصد ہے۔
