پاکستان ٹیلی کمیونیکیشن اتھارٹی (پی ٹی اے) نے ٹیکس ریٹرن فائل نہ کرنے والوں کی موبائل سمیں بند کرنے کی تجویز کی مخالفت کردی۔
فیڈرل بورڈ آف ریونیو (ایف بی آر) نے 5 لاکھ سے زیادہ ایسے افراد کی سمیں بند کرنے کی تجویز دی تھی جو ٹیکس دینے کی اہلیت رکھنے باوجود ٹیکس نیٹ میں شامل نہیں۔
مزید پڑھیں
میڈیا رپورٹس کے مطابق پی ٹی اے نے ایف بی آر کو خط لکھا ہے جس میں کہا گیا ہے کہ سمیں بلاک کرنے کا عمل ان کے فریم ورک سے مطابقت نہیں رکھتا، اس کے علاوہ وہ قانونی طور پر سمیں بند کرنے کے حکم پر عملدرآمد کے بھی پابند نہیں ہیں۔
خط میں یہ بھی کہا گیا ہے کہ پاکستان میں صرف 27 فیصد خواتین ایسی ہیں جو اپنے نام پر نکالی گئی سمیں استعمال کرتی ہیں، اس کے علاوہ خواتین اور بچوں کی سمیں ان کے بڑوں کے نام پر ہوتی ہیں۔
پی ٹی اے کے مطابق اگر تجویز کے مطابق سمیں بند کرنے کا عمل شروع کیا جاتا ہے تو اس سے ای کامرس اور ٹرانزیکشنز کا عمل متاثر ہوگا۔
پی ٹی اے کی جانب سے ایف بی آر کو تجویز دی گئی ہے کہ ٹیکس نہ دینے والوں کی سمیں بند کرنے کے بجائے اس کا کوئی اور لائحہ عمل پیش کیا جائے۔
واضح رہے کہ ایف بی آر نے 6 لاکھ سے زیادہ ٹیکس نہ دینے والے افراد کی نشاندہی کی تھی جبکہ پی ٹی اے کو 5 لاکھ سے زیادہ افراد کی سمیں بند کرنے کی ہدایت بھی کی گئی تھی۔