ملائیشیا میں سلطان اذلان شاہ ہاکی کپ کے 30 ویں ایڈیشن کے پہلے روز افتتاحی میچوں میں پاکستان نے میزبان ملک ملائیشیا کو 4-5 سے شکست دے کر ٹورنامنٹ میں فاتحانہ آغاز کر دیا ہے۔
مزید پڑھیں
سلطان اذلان شاہ ہاکی ٹورنامنٹ میں پاکستان کا شاندار آغاز، پہلے میچ میں ملائیشیا کو 4 کے مقابلے میں 5 گول سے شکست دے دی، پاکستان نے آخری ہاف میں 4 گول کیے۔
قومی ہاکی ٹیم کی خاص بات یہ رہی کہ اس نے کھیل کے آخری کوارٹر میں شاندار کھیل کا مظاہرہ کرتے ہوئے میزبان ٹیم کے خلاف 4 گول کر کے فاتحانہ آغاز کیا۔
اس سے قبل مد مقابل دونوں ٹیموں کے درمیان پہلے کوارٹر کا کھیل ختم ہوا تو میچ ایک، ایک گول سے برابر تھا، دوسرے کوارٹر میں میزبان ملائیشیا کی ٹیم کو 2، 1 کی برتری حاصل تھی۔
پاکستان اور ملائیشیا کے میچ کے تیسرے کوارٹر کا کھیل جب اپنے اختتام کو پہنچا تو میزبان ملائیشیا کو 3، 1 کی برتری حاصل تھی لیکن چوتھے اور آخری کوارٹر میں ملائیشیا کی ٹیم صرف ایک گول کر سکی جبکہ پاکستان شاندار انداز سے کھیل میں واپس آ گیا اور اس نے 4 گول داغ دیے اور ملائیشیا کو 4 کے مقابلے 5 گول سے شکست دے کر فاتحانہ آغاز کیا۔
یاد رہے کہ یہ ٹورنامنٹ 4 سے 11 مئی تک ملائیشیا کے شہر ایپوہ میں کھیلا جا رہا ہے۔ انٹرنیشنل ہاکی فیڈریشن کے مطابق سلطان اذلان شاہ کپ میں 6 ٹیمیں حصہ لے رہی ہیں جن میں کینیڈا، جاپان، ملائیشیا، نیوزی لینڈ، پاکستان اور جنوبی کوریا شامل ہیں۔
ان 6 ٹیموں میں جاپان کے علاوہ 5 ٹیمیں ٹورنامنٹ کے فورا بعد ایف آئی ایچ ہاکی مینز نیشنز کپ میں شرکت کے لیے پولینڈ جائیں گی۔
سلطان اذلان شاہ کپ 2024 کا آغاز راؤنڈ رابن مرحلے سے ہوا جہاں تمام 6 ٹیمیں ایک دوسرے کے خلاف کھیلیں گی جس کے بعد پلے آف میچ کھیلے جائیں گے۔
لیگ مرحلے میں سب سے کم میچ جیتنے والی ٹیمیں پانچویں پوزیشن کے لیے مقابلہ کریں گی۔ پول مرحلے میں تیسری اور چوتھی پوزیشن حاصل کرنے والی ٹیمیں کانسی کے تمغے کے لیے مدمقابل ہوں گی جبکہ ٹاپ 2 ٹیمیں ٹائٹل کے لیے فائنل میں مدمقابل ہوں گی۔
ٹورنامنٹ سنگل لیگ کی بنیاد پر کھیلا جا رہا ہے، پاکستان نے اپنا پہلا میچ آج ملائیشیا کیخلاف کھیلا، دوسرا میچ جنوبی کوریا، تیسرا جاپان، چوتھا کینیڈا اور پانچواں میچ نیوزی لینڈ کیخلاف کھیلے گا۔
