ملائشیا میں جاری 30ویں سلطان اذلان شاہ ہاکی کپ میں پاکستان نے ایک دلچسپ اور سنسنی خیز مقابلے کے بعد کینیڈا کو بھی شکست دے دی۔ پاکستان نے یہ مقابلہ 5-4 گول سے جیت لیا۔
مزید پڑھیں
تفصیلات کے مطابق، کھیل کے آٖغاز میں کینیڈا کو پاکستان پر 0-2 سے برتری حاصل تھی، تاہم پاکستان ٹیم نے شاندار کم بیک کرتے ہوئے یکے بعد دیگرے گول داغ کر کینیڈا کو 4 کے مقابلے میں 5 گول سے شکست دے دی۔
اس دلچسپ اور سنسنی خیز میچ میں پاکستان کی جانب سے ابوبکر نے 2 جبکہ لیاقت ارشد، رانا وحید اشرف اور علی غضنفر نے ایک ایک گول کیا۔
کینیڈا کی جانب سے ڈیوس شان نے 2 گول جبکہ سدھو ہربیر اور بٹر ایوجوت نے ایک گول اسکور کیا۔
واضح رہے کہ پاکستان اس ٹورنامنٹ میں اب تک ناقابل شکست ہے اور جاپان کے خلاف میچ برابر ہونے کے باوجود پوائنٹس ٹیبل پر بھی سب سے آگے ہے۔ اس سے قبل پاکستان نے افتتاحی میچ میں میزبان ملائشیا کو 5-4 اور جنوبی کوریا کو 4-0 سے شکست دی تھی۔
