بلوچستان میں ڈیموں کی تعمیر دوران 2 ارب 4 کروڑ روپے سے زیادہ کی مالی بے ضابطگیوں اور غیر قانونی اخراجات کا انکشاف ہوا ہے۔
محکمہ خزانہ کے مطابق صوبے میں 100 چھوٹے ڈیموں کی تعمیر کے لیے خطیر رقم کے استعمال اور وسائل کے ضیاع پر خصوصی طور پر آڈٹ کیا گیا۔
مزید پڑھیں
خصوصی آڈٹ رپورٹ کے مطابق 100 ڈیموں میں سے 26 ڈیموں پر تعمیر کا کام 2018 کے بجائے 2021 میں مکمل ہوا، 4 سال کی تاخیر کے باعث ڈیموں کی لاگت میں 26 کروڑ 10 لاکھ روپے کا اضافہ ہوا اور تاخیر کے باعث پراجیکٹ عملدرآمد یونٹ اور سپرویژن اخراجات میں 13 کروڑ 26 لاکھ کا اضافہ ہوا۔
آڈٹ رپورٹ کے مطابق ٹھیکیداروں سے سیکیورٹی کی مد میں 12 کروڑ روپے کی کٹوتی نہیں کی گئی، انکم ٹیکس کی مد میں ٹھیکیداروں سے 99 لاکھ روپے کم کاٹے گئے جبکہ نان شیڈولڈ ریٹس کی مد میں 11 کروڑ 26 لاکھ روپے کی اضافی ادائیگیاں کی گئیں۔
رپورٹ میں کہا گیا ہے کہ کمپیکشن ٹیسٹ کی مد میں 95 کروڑ روپے سے زیادہ کے بے ضابطہ اخراجات کیے گئے، لیباریٹری ٹیسٹ کرائے بغیر 15 کروڑ روپے سے زیادہ کے بے ضابطہ اخراجات ہوئے۔
رپورٹ کے مطابق مٹی نکالنے اور چٹانوں کو دھماکا خیز مواد سے اڑانے کی مد میں 13 کروڑ 18 لاکھ روپے کے غیر مجاز اخراجات کیے گئے۔
