گورنر خیبرپختونخوا فیصل کریم کنڈی نے پیپلزپارٹی کے وفاقی کابینہ کا حصہ بننے کی خبروں کی تردید کی ہے۔
فیصل کریم کنڈی نے پشاور میں نجی ٹی وی سے گفتگو کرتے ہوئے کہاکہ پیپلزپارٹی میں کوئی بھی فیصلہ سینٹرل ایگزیکٹو کمیٹی کے فورم پر کیا جاتا ہے۔
انہوں نے کہاکہ پاکستان تحریک انصاف جان بوجھ کر فوج کو سیاست میں دھکیل رہی ہے۔ ’ایک طرف یہ کہتے ہیں کہ اسٹیبلشمنٹ سیاست میں مداخلت کررہی ہے جبکہ دوسری طرف کہا جاتا ہے کہ ہم بات صرف آرمی چیف اور ڈی جی آئی ایس آئی سے کریں گے‘۔
مزید پڑھیں
فیصل کریم کنڈی نے کہاکہ وزیراعلیٰ خیبرپختونخوا یا کابینہ ارکان کی جانب سے حلف برداری کی تقریب میں شرکت نہ کرنے پر مجھے کوئی تکلیف نہیں۔ میں مسائل کے حل کے لیے وزیراعلیٰ ہاؤس سمیت کہیں بھی جا سکتا ہوں۔
انہوں نے کہاکہ سیاسی جماعتوں کو بالآخر سیاسی جماعتوں سے ہی بات کرنا پڑتی ہے، ہم مولانا فضل الرحمان سمیت تمام سیاسی جماعتوں سے مذاکرات کریں گے۔
فیصل کریم کنڈی نے کہاکہ جن سیاسی جماعتوں کو انتخابات کے حوالے سے تحفظات ہیں وہ متعلقہ فورمز سے رجوع کریں۔
گورنر خیبرپختونخوا نے کہاکہ سراج الحق اور آفتاب شیر پاؤ سمیت مختلف سیاسی شخصیات سے رابطہ کرکے انہیں اعتماد میں لیا ہے۔ جو مسائل وفاق سے جڑے ہیں انہیں افہام و تفہیم سے حل کیا جائے گا۔
