ایران میں بارش کے ساتھ آسمان سے مچھلیاں برسنے لگیں، ویڈیو وائرل

مغربی ایران کے شہر یاسوج کے شہری اس وقت حیران رہ گئے جب انہیں آسمان سے بارش کے ساتھ ساتھ مچھلیاں برستی دکھائی دیں۔اس نایاب منظر کی ویڈیوز سوشل میڈیا پر وائرل ہوگئی جس پر صارفین نے شدید حیرت کا اظہار کیا۔

ایرانی شہریوں کے شیئر کردہ ایک ویڈیو کلپ میں دیکھا جا سکتا ہے کہ شہر کے اندر ٹریفک رواں دواں ہے. اس دوران سڑک پر درجنوں مچھلیاں گرتی دیکھی گئیں۔

مزید پڑھیں

ماہرین موسمیات کے مطابق مچھلیوں کا آسمان سے برسنا ایک نایاب موسمیاتی مظہر ہے جہاں چھوٹی مچھلیاں، مینڈک یا دیگر چھوٹے جانور بظاہر طوفان کے دوران آسمان سے غیر معمولی طور پر گرتے ہوئے دیکھے جاتے ہیں۔

اگرچہ یہ سننے میں عجیب لگ سکتا ہے لیکن ایسے مظاہر کا ہونا دنیا میں مستند مانا جاتا ہے جس کی چند صورتیں ہیں۔

ایک ریسرچ یہ بتاتی ہے کہ شدید موسمی صورتحال کے دوران بننے والے آبی بگولے جو دریا یا سمندر کے اوپر تشکیل پاتے ہیں، پانی سے مچھلیوں کواپنے اندر سمیٹ لیتے ہیں۔ جب مچھلیاں اوپر اٹھتی ہیں تو وہ بھنور کے ساتھ آگے بڑھتی ہوئی مخصوص مقام پر برستی ہیں جبکہ ایسا ہی کچھ ہوا کے بگولے یعنی ٹارنیڈو میں بھی دیکھا جاسکتا ہے۔

ایک تحقیق کے مطابق دریائی علاقوں میں جب گرج چمک کا طوفان داخل ہورہا ہوتا ہے تو موسم کی خرابی کے سبب پرندے پریشانی میں ادھر ادھر اڑنے لگتے ہیں اور اکثر اس الجھن کی کیفیت میں ان کے منہ میں مچھلیاں جو دریاؤں سے اُٹھائی گئی ہوتی ہیں زمین کی جانب گر پڑتی ہیں۔