قیدیوں کو جیل میں ہیٹ سٹروک سے بچانے کے لیے انسپکٹر جنرل (آئی جی ) جیل خانہ جات میاں فاروق نذیر کئی نئے اقدامات کا سوچ رہے ہیں۔
جیسے ہی گرمی کی شدت میں اضافہ ہوا ہے جیل میں قیدیوں کو گرمی سے بچانے کے انتظامات کیے جارہے ہیں، آئی جی جیل خانہ جات نے ایک حکم نامہ جاری کیا ہے جس میں کہا گیا ہے کہ پنجاب کے جیلوں میں قید قیدیوں کے لیے سب سے پہلے آئس باکس اور آئس کی فراہمی کو یقینی بنایا جائے۔
حکم کے مطابق اسیران کے لیے پنجاب کی جیلوں میں واٹر کولر چلر کچی لسی اور لیمن پانی کا انتظام کیا جائے۔ جیلوں میں صاف اور ٹھنڈے پانی کی فراہمی کو بھی یقینی بنایا جائے اور قیدیوں کو دن میں زیادہ سے زیادہ نہانے کی ہدایات کی جائیں۔
آئی جی جیل خانہ جات میاں فاروق نذیر نے مزید کہا کہ بچوں اور خواتین کے لیے کچی لسی، لیموں پانی کا انتظام الگ سے ہونا چاہیے۔صفائی ستھرائی کا مناسب انتظام کیا جائے۔
آئی جی جیل خانہ جات کے ہدایت نامہ کے مطابق پنجاب کی جیلوں میں لیموں پانی، کچی لسی،کولر اور ٹھنڈے پانی کی سہولت 31اگست تک نافذ العمل رہے گی۔
اس حوالے سے آئی جی جیل نے عملدرآمد کے لیے ڈی آئی جیز اور سپرنٹنڈنٹس کو مراسلہ جاری کردیا ہے۔
