190 ملین پاؤنڈ ریفرنس کی اڈیالہ جیل میں سماعت کے دوران سابق خاتون اول بشریٰ بی بی نے اسلام آباد کی احتساب عدالت پر عدم اعتماد کا اظہار کیا تاہم وکلا سے مشورے کے بعد نئی درخواست دائر کی گئی جس میں پیشی ہر 14 روز بعد رکھنے کی استدعا کی گئی۔
مزید پڑھیں
سماعت کے آغاز پر بشریٰ بی بی نے روسٹرم پر جاکر عدالت پر عدم اعتماد کا اظہار کرتے ہوئے کہا تھا کہ گزشتہ سماعت ان کے بغیر کی گئی اور وہ انتظار کرتی رہ گئیں۔
اس پر عدالت نے انہیں بتایا کہ گزشتہ سماعت بغیر کارروائی کے ملتوی کردی گئی تھی جس کی استدعا جیل انتظامیہ نے کی تھی۔
تاہم اس پر بشریٰ بی بی نے کہا کہ انہیں کسی نے سماعت ملتوی ہونے پر آگاہ نہیں کیا۔ انہوں نے کہا کہ ’میں قیدی نہیں نا انصافیوں کا شکار ہوں، مجھے آپ پر اعتماد نہیں جیسے سابقہ ججز پر نہیں تھا‘۔
عدالت نے بشریٰ بی بی کے وکلا سے استفسار کیا کہ کہا انہیں عدالت پر اعتماد نہیں جس پر انہوں نے کہا کہ انہیں اعتماد ہے تاہم تھوڑی دیر موکلہ سے مشورہ کرنے کی اجازت دی جائے۔
عمران خان، وکلا نے بشریٰ بی بی کو منا لیا
عدالت نے اجازت دی جس کے بعد مشاورت کے دوارن بانی پی ٹی آئی عمران خان اور وکلا ڈیڑھ گھنٹے تک بشریٰ بی بی کو سمجھاتے رہے اور بالآخر بشریٰ بی بی نے دوبارہ عدالت پراعتماد کا اظہار کردیا۔
بانی پی ٹی آئی اور بشریٰ بی بی کے وکلا نے مشاورت کے بعد عدالت میں نئی درخواست دائر کی جس میں استدعا کی گئی کہ دیگر مقدمات کی طرح کیس کی ہر 14 دن بعد سماعت رکھی جائے۔
عدالت نے درخواست پر نوٹس جاری کرتے ہوئے سماعت 22 مئی تک ملتوی کردی۔ جمعے کو کسی بھی گواہ کا بیان قلمبند نہیں ہوسکا۔
