وفاقی وزیر مملکت برائے آئی ٹی شزہ فاطمہ نے کہا ہے کہ پاکستان کی آئی ٹی سروسز کی برآمدی ترسیلات میں اپریل 2024 میں 31 کروڑ ڈالرز کا تاریخی اضافہ ہوا ہے۔ پاکستان کی تاریخ میں ایک مہینے میں آئی ٹی برآمدات میں اتنا اضافہ پہلی دفعہ ہوا ہے۔
وزارتِ انفارمیشن ٹیکنالوجی کے مطابق شزہ فاطمہ نے کہا ہے کہ آئی ٹی برآمدات میں گذشتہ برس اپریل کے مہینے کے مقابلے میں 62.3 فیصد اضافہ ہوا ہے۔ مالی سال 2023-24 کے جولائی 2023 سے اپریل 2024 کے دوران آئی ٹی برآمدات گزشتہ مالی سال کے اسی عرصہ کے 2.135 بلین ڈالرز کے مقابلے میں 2.593 بلین ڈالرز تک پہنچ گئی ہیں۔
مزید پڑھیں
شزہ فاطمہ نے کہا ہے کہ آئی ٹی برآمدات میں اضافہ لانا موجودہ حکومت کی پہلی ترجیح ہے۔ آئی ٹی برآمدات میں یہ اضافہ وزیراعظم پاکستان کی انتھک محنت کا نتیجہ ہے۔ وزیراعظم پاکستان نے پی ڈی ایم حکومت میں ملک کو ڈیفالٹ سے بچا کر معشیت کو مضبوط کیا جس کے نتائج آج آرہے ہیں۔
وفاقی وزیر مملکت برائے آئی ٹی کا کہنا تھا کہ آئی ٹی برآمدات میں اضافہ کے لیے اقدامات جاری ہیں۔ ایس آئی ایف سی کی بھر پور معاونت سے وزارت آئی ٹی اور پاکستان سافٹ ویئر ایکسپورٹ بورڈ، آئی ٹی برآمدات میں اضافہ کے لیے کوشاں ہیں۔
