گرمی نے ملک بھر میں شہریوں کے ہوش اڑا رکھے ہیں۔ ملک کے بیشتر علاقوں میں گرمی اس قدر شدید ہے کہ جیسے سورج زمین پر اتر آیا ہو۔ اُدھر محکمہ موسمیات نے گرمی کی لہر میں مزید شدت آنے اور درجہ حرارت بڑھنے کا امکان ظاہر کیا ہے۔ رواں ہفتے ملک کے بیشتر میدانی علاقے شدید گرمی کی لہر کے زیراثر رہیں گے۔ موہنجو داڑو میں درجہ حرارت 51 ڈگری تک پہنچ گیا ہے۔
موسم کا حال بتانے والوں کا کہنا ہے کہ سندھ اور پنجاب میں دن کا درجہ حرارت معمول سے 06 سے 08 جبکہ خیبرپختونخوا اور بلوچستان میں دن کا درجہ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے۔
مزید پڑھیں
پنجاب اور سندھ کے میدانی علاقوں میں گرمی کی لہر نے گھروں سے باہر نکلنا محال کردیا ہے۔ سب سے زیادہ گرمی موہنجو داڑو میں پڑی جہاں درجہ حرارت 51 ڈگری تک پہنچ گیا۔ خیرپور، جیکب آباد 50، روہڑی، لاڑکانہ، سکھر، دادو 49، خان پور، رحیم یار خان، پڈعیدن، سبی اور ڈی جی خان میں درجہ حرارت 48 ڈگری ریکارڈ کیا گیا۔ شہید بینظیر آباد، بہاولنگر، کوٹ ادو، لسبیلہ اور مٹھی درجہ حرارت 47 ڈگری سینٹی رہا۔
موسم کا حال سنانے والوں کا کہنا ہے کہ رواں ہفتے ملک کے بیشتر میدانی علاقے شدید گرمی کی لہر کے زیراثر رہیں گے۔ اس دوران بالائی خیبر پختونخوا، گلگت بلتستان اور کشمیر میں مطلع جزوی ابر آلود رہنے کے علاوہ تیز ہواؤں اورگرج چمک کے ساتھ بارش ہوسکتی ہے۔
اسلام آباد اور گر دو نواح میں موسم شدید گرم رہے گا۔ دن کا درجہ حرارت معمول سے 03 سے 05 ڈگری سینٹی گریڈ زیادہ رہنے کا امکان ہے۔ سندھ اور پنجاب کے بیشتر اضلاع میں دن کا درجہ حرارت معمول سے 06 سے 08 ڈگری سینٹی گریڈ زیادہ رہنے کا امکان ہے۔ خیبرپختونخوا اور بلوچستان کے بیشتر اضلاع میں دن کا درجہ حرارت معمول سے 4 سے 6 ڈگری سینٹی گریڈ زیادہ رہنے کا امکان ہے۔
