پاکستان اور بھارت کے مابین سیاسی تعلقات تو اتار چڑھاؤ کا شکار رہتے ہیں لیکن دونوں ممالک کے اداکار اکثر سوشل میڈیا پر ایک دوسرے کو نیک تمناؤں کے پیغامات دیتے نظر آتے ہیں۔
حال ہی میں بالی ووڈ اداکارہ سونم کپور نے بھی پاکستان کے معروف اداکار فواد خان کے ساتھ اپنی چند تصاویر سوشل میڈیا پر شیئر کی ہیں جنہیں صارفین کی جانب سے خوب پسند کیا جا رہا ہے۔
سماجی رابطوں کی سائیٹ فیس بک پر اپنی پوسٹ میں سونم کپور نے لکھا کہ ’خوبصورت دن فواد خان کے ساتھ‘۔ جس پر صارفین کی جانب سے مختلف تبصرے کیے جا رہے ہیں۔
کسی نے کہا کہ آپ دونوں ایک ساتھ بہت اچھے لگ رہے ہیں تو کئی پاکستانی صارفین ایسے بھی تھے جنہوں نے سونم کپور کو مخاطب کرتے ہوئے کہا کہ اب ہمارے لڑکے کو بھول جاؤ۔
واضح رہے کہ سپر اسٹار فواد خان نے 2014 میں بالی وڈ فلم ’خوبصورت‘ میں ڈیبیو کیا تھا جس میں مرکزی اداکارہ سونم کپور تھیں۔
فلم ’خوبصورت‘ 2014 میں ریلیز ہوئی، اس فلم کے لیے انہیں فلم فیئر ایوارڈ سے بھی نوازا گیا تھا، فلم ’خوبصورت‘ کے بعد فواد خان نے ایک اور بالی ووڈ فلم ’کپور اینڈ سنز‘ اور کرن جوہر کی فلم ’اے دل ہے مشکل‘ میں بھی معاون کردار ادا کیا، جسے خوب پسند کیا گیا۔
یاد رہے کہ بالی ووڈ پنجابی اداکارہ سونم باجوہ نے بھی پاکستانی اداکار فواد خان سے اپنی محبت کا اظہار کرتے ہوئے انہیں ہمیشہ کے لیے اپنا کرش قرار دیا ہے۔
سونم باجوہ ماضی میں بھی فواد خان کے لیے اپنی محبت کا اظہار کرتی رہی ہیں اور کہتی رہی ہیں کہ ان کے دل میں جو پاکستانی اداکار کی جگہ ہے، وہ کوئی اور اداکار کبھی نہیں لے سکتا۔