قدیم اور تاریخی عمارتوں کو اصل حالت میں بحال کیا جائے، نواز شریف کا مطالبہ

سابق وزیر اعظم اور صدر پاکستان مسلم لیگ ن میاں محمد نواز شریف نے قدیم اور تاریخی عمارتوں کی اصل حالت میں بحالی اور قومی اثاثوں کو تباہ کرنے والوں کے احتساب کا مطالبہ کردیا ہے۔

نواز شریف اور ‏وزیر اعلیٰ پنجاب مریم نواز کی زیرِ صدارت پنجاب ہاؤس مری میں ن لیگی رہنماؤں کا اجلاس ہوا جس میں ملکی سیاسی صورتحال اور پارٹی امور پر تبادلہ خیال کیا گیا۔

اجلاس میں نواز شریف نے قدیم اور تاریخی عمارتوں کو نقصان پہنچانے والوں پر غم و غصے کا اظہار کیا، اور فیصلہ کیا کہ مری کی قدیم اور تاریخی عمارتوں کو اصل حالت میں بحال کیا جانا چاہیے۔

اجلاس میں مری کے داخلی راستوں پر ڈیجیٹل کیمروں کی تنصیب کے لیے 15 دن کی مدت بھی مقرر کی گئی۔ اس موقع پر نواز شریف کا کہنا تھا کہ عوامی فلاح کے پروجیکٹ میں تاخیر کا سبب بننے والے قوانین میں ترامیم کی جائیں۔

انہوں نے اجلاس میں قومی اثاثوں، قدیم اور تاریخی عمارتوں کی اہمیت پر زور دیتے ہوئے کہا کہ جنہوں نے قومی اثاثوں کو تباہ کیا ہے، ان سب کا احتساب ہونا چاہیے۔