پاک بھارت ٹاکرا: ’چلو چلو پنڈی کرکٹ اسٹیڈیم چلو‘ انٹری مفت

پاکستان اور بھارت کے ہائی وولٹیج ٹی20 میچ کے لیے راول پنڈی کرکٹ اسٹیڈیم کے فین پارک میں شائقین کے لیے انٹری فری کر دی گئی ہے۔ جنرل انکولژرز میں انٹری فری ہوگی جبکہ وی آئی پی انکوژلرز کے ٹکٹ آن لائن دستیاب ہیں۔

ورلڈکپ ٹی20 کے موقع پر آئی سی سی کی جانب سے پہلی مرتبہ مختلف ممالک کے اسٹیڈیمز میں فین پارکس بنائے گئے ہیں۔ امریکا اور ویسٹ انڈیز میں کھیلے جانے والے اس ٹورنامنٹ کے لیے پاکستان، بھارت، انگلینڈ، جنوبی افریقہ اور امریکا کے مختلف ریاستوں میں فین پارکس بنائے گئے ہیں، جہاں مختلف میچز بڑی اسکرینز پر دکھائے جائیں گے۔

آئی سی سی نے آج امریکا کے شہر نیویارک میں پاکستان اور بھارت کے درمیان کھیلے جانے والا میچ 8 مختلف مقامات پر دکھانے کا بندوبست کیا ہے۔ جس میں راولپنڈی کرکٹ اسٹیڈیم، نئی دہلی، جنوبی افریقہ، برطانیہ اور 4 امریکی ریاستوں میں میچز بڑی اسکرینز پر دکھائے جائیں گے۔

راول پنڈی کرکٹ اسٹیڈیم میں پاک بھارت میچ دکھانے کے لیے انتظامات مکمل کرلیے گئے ہیں۔ پی سی بی حکام کے مطابق فین پارک میں انتظامات آئی سی سی کی ذمہ داری ہیں، پی سی بی نے صرف گراؤنڈ مہیا کیا ہے۔ فین پارک میں 5 سے زائد بڑی اسکرینز لگائی گئی ہیں، جہاں پاک بھارت میچ براہ راست دکھایا جائے گا۔

شائقین فین پارک کے ٹکٹس ’بک می ڈاٹ پی کے‘ سے حاصل کرسکتے ہیں۔ فین پارک کے ٹکٹ 500 سے لے کر 1000 روپے تک مقرر کیا گیا ہے۔ جنرل انکولژر کی ٹکٹ 500 روپے تھی جسے آج مفت کردیا گیا ہے، پریمئیم ٹکٹ 750 جبکہ وی آئی پی گیلری کا ٹکٹ 1000 روپے میں فروخت کیا جارہا ہے۔