حکومت پنجاب کا جنگلی حیات کو غیر قانونی مقید رکھنے پر کومبنگ آپریشن جاری ہے۔ ایک تازہ کارروائی میں تیتر کی آن لائن بین الصوبائی خرید و فروخت کرنے والے یوٹیوبر کے نیٹ ورک کو پکڑلیا گیا ہے۔
محکمہ جنگلی حیات کے اسپشل اسکواڈ نے ڈی جی وائلڈ لائف کی نگرانی میں یوٹیوبر مظہر اقبال پر کے ڈیرے پر چھاپا مار کر اسے گرفتار کرلیا، اس موقع پر تیتر اور نایاب پرندے بھی بازیاب کیے گئے۔ یوٹیوبر مظہر اقبال عرصہ دارز سے نواب شاہ سے تیتر کی مختلف اقسام کو منگوا کر لاہور سمیت پنجاب کے مختلف اضلاع میں آن لائن فروخت کررہا تھا۔
مزید پڑھیں
مظہر اقبال تیتر کے انڈوں، بچوں اور بڑے تیتروں کو غیر قانونی طور پر آن لائن فروخت کر رہا تھا۔ مظہر اقبال یوٹیوب پر ’بابافرید کالا تیتر‘ چینل کے ذریعے تیتروں کی فروخت کرتا تھا۔
ترجمان وائلڈ لائف پنجاب نے کہا ہے کہ محکمہ جنگلی حیات آن لائن خرید و فروخت میں ملوث دیگر افراد کو بھی ٹریس کر رہا ہے۔ برآمد کردہ تیتروں کی مختلف اقسام کو مناسب بحالی کے لیے لاہور سفاری میں منتقل کیا جائے گا۔
